រដូវកាលនេះ ហាក់ដូចជារដូវកាលមួយមិនសមប្រកបឡើយ សម្រាប់ក្រុម Barcelona ក្នុងការទិញកីឡាករចំណូលថ្មីយកមកពង្រឹងក្លិប។

ជាការពិតណាស់ ក្រោយពីការចាកចេញ របស់ខ្សែប្រយុទ្ធឆ្នើម Neymar ទៅកាន់ក្រុម Paris Saint Germain នោះ ក្រុម Barcelona ពិតជាយ៉ាប់យឺនយ៉ាងខ្លាំង ក្នុងការតាមប្រមាញ់ កីឡាករ មកជំនួសតំណែងរបស់ Neymar ។ ក្នុងនោះដែរ ក្រុមយក្សអេស្ប៉ាញ Barcelona បានបរាជ័យក្នុងការទិញយក Ousmane Dembele និងការបដិសេធមិនលក់ Philippe Coutinho ចំនួន៣លើកមកហើយ ពីក្រុមហង្សក្រហម Liverpool ។ យ៉ាងណាវិញ បើតាមការចុះផ្សាយ របស់ ESPN reports បានឲ្យដឹងថា ក្រុម Barcelona កំពុងតែព្យាយាម មកលួងលោម ក្រុម Paris Saint Germain ឲ្យលក់ខ្សែបម្រើប្រយុទ្ធអាហ្សង់ទីន Angel Di Maria មកឲ្យក្រុមយក្សអេស្ប៉ាញមួយនេះ។

ការចង់បាន Di Maria នេះដែរ វាអាចទៅរួចសម្រាប់ Barcelona ព្រោះថា ក្រុម Paris កំពុងតែជិតនាំយក Mbappe ក្នុងលក្ខខ័ណ្ឌខ្ចីជើង ពីក្រុម AS Monaco ទៅហើយ ដែលជាការជះឥទ្ធិពលយ៉ាងខ្លាំង ដល់ Di Maria ។ យ៉ាងណាវិញ សម្រាប់ Di Maria ដូចជាចង់ត្រឡប់ មកកាន់ក្លិបចាស់របស់គេ Real Madrid វិញ ជាជាងមកកាន់ក្រុម Barcelona ដែលធ្លាប់ជាអតីតគូសត្រូវ ក្នុងទីលាន។ ក៍ប៉ុន្តែ ក្រុម Barcelona ហាក់ដូចជាពេញចិត្ត ចំពោះកីឡាករ អាហ្សង់ទីនរូបនេះណាស់ ខណះខកចិត្តចំពោះ Dembele និង Coutinho ។ គួរបញ្ជាក់ផងដែរថា Di Maria បានចាកចេញពីក្រុម Real Madrid កាលពីឆ្នាំ ២០១៤ ដោយទៅចូលរួមជាមួយក្រុម Manchester United មុននឹងផ្លាស់ទៅកាន់ក្រុម Paris Saint Germain នៅឆ្នាំ ២០១៥ វិញ។ ម្យ៉ាងវិញទៀត នៅរដូវកាលថ្មីនេះ Di Maria អាចនឹងវិលមកកាន់ Laliga វិញ ដែលទំនងជាមកកាន់ក្រុម Barcelona ។

ជាក់ស្តែងសម្រាប់ក្រុម Barcelona វិញក៍មានបំណងចង់បានកីឡាករអាហ្សង់ទីនរូបនេះដែរ។ ដូច្នេះហើយ Barcelona អាចនឹងក្លាយ ជាក្លិបថ្មីរបស់កីឡាករ Angel Di Maria ក្នុងពេលឆាប់ៗនេះ ប្រសិនបើ ក្លិបយក្សអេស្ប៉ាញមួយនេះ មិនអាចនាំយក Coutinho ឬ Dembele បាននោះ។