ក្រុម Paris Saint Germain បានបន្តយកឈ្នះលើក្រុមម្ចាស់ផ្ទះ Metz ក្នុងលទ្ធផល ៥-១ ដើម្បីគ្រងតំណែងកំពូលតារាង League1 បន្តទៀត។

ជាក់ស្តែងណាស់ ក្រុម Paris Saint Germain បានប្រើនូវប្រព័ន្ធប្រយុទ្ធថ្មី CNM ដែលមាន Edinson Cavani, Neymar និង Kylian Mbappe ប្រកបទៅដោយប្រសិទ្ធិភាព។ ថ្វីបើតង់ទី១ PSG មិនអាចធ្វើអ្វីបានទៅលើក្រុម Metz ដោយអាចធ្វើបានត្រឹម ១-១​ ក៍ដោយ ពីការស៊ុតរបស់ Edinson Cavani នៅនាទីទី៣១ និងតាមស្មើមកវិញដោយកីឡាករ Emmanuel Riviere នៅនាទីទី៣៧។ តែក្រោយពី Assou-Ekotto របស់ក្រុម Metz ទទួលបានកាតក្រហម នៅនាទីទី ៥៦បានធ្វើឲ្យស្ថានការណ៍មានការប្រែប្រួលយ៉ាងខ្លាំង។

ជាក់ស្តែងណាស់ នៅនាទីទី ៥៩ ខ្សែប្រយុទ្ធវ័យក្មេងចំណូលថ្មី Kylian Mbappe ស៊ុតលើដំបូលទូកយ៉ាងស្អាត រកបានគ្រាប់ដំបូង និងជាគ្រាប់ទី២ សម្រាប់ក្រុម PSG ។ យ៉ាងណាវិញ Neymar បានបន្ថែមមួយគ្រាប់ទៀត នៅនាទីទី៦៩ ដោយការស៊ុតពីលើដំបូលទូកយ៉ាងស្អាត ខណៈ Edinson Cavani រកបានបន្ថែមគ្រាប់ទី២ របស់គេក្នុងការប្រកួតនេះ នៅនាទីទី ៧៥ ស្របពេលដែល Lucas Moura រកបានគ្រាប់ទី៥ នៅចុងម៉ោងនាទីទី៨៧។ តាមរយៈទម្រង់លេងយប់មិញនេះ Paris Saint Germain គួរតែធ្វើបានច្រើនជាងនេះ ព្រោះថា Cavani មានឱកាសច្រើនណាស់ ក្នុងការរកគ្រាប់តែត្រូវបានរារាំង ដោយអ្នកចាំទីក្រុម Metz ។

យ៉ាងណាក៍ដោយ នេះក៍ជាការបង្ហាញទម្រង់លេងយ៉ាងប្រសើរសម្រាប់ តំបន់ប្រយុទ្ធ CNM ដែលកីឡាករ ជួរមុខទាំង៣រូប សុទ្ធសឹងរកគ្រាប់បានទាំងអស់ ដែល Cavani រកបាន២គ្រាប់, Neymar ១គ្រាប់ និង Mbappe ១គ្រាប់ ចំណែកគ្រាប់ទី៥ រកបានដោយ Lucas ។ ដូចនេះហើយ CNM របស់ក្រុម Paris Saint Germain នឹងបន្តធ្វើព្យុះភ្លៀងបន្តទៀតនៅ League1 និងពានអឺរ៉ុបឲ្យក្រុម PSG ។

https://www.youtube.com/watch?v=potwVlOKadU