បន្ទាប់ពីមាន ពត៌មាននៃការប្រេះឆា រវាងខ្សែប្រយុទ្ធជួរមុខ Neymar និង Cavani រហូតឈានដល់ការស្នើសុំប្រធានក្លិប​ក្នុងការលក់ Cavani នោះ នៅពេលនេះ ក្លិបធំៗ មួយចំនួនបានចេញមុខចាំទទួលយកខ្សែប្រយុទ្ធអ៊ុយរ៉ាហ្គាយ​ រូបនេះហើយ។

ជាក់ស្តែងណាស់ បើតាមការចុះផ្សាយរបស់ Sky Sports បានឲ្យដឹងថា ក្រុម តោខៀវ Chelsea, Everton, Tottenham, Arsenal រួមទាំងក្លិបចាស់ របស់ Cavani គឺ Napoli បានត្រៀមខ្លួន​រួចជាស្រេច ក្នុងការទទួលយកខ្សែប្រយុទ្ធវ័យ ៣០ឆ្នាំរូបនេះ។ ជាការពិតណាស់ Edinso Cavani អាចប្រឈមនឹងការលក់ចេញ ប្រសិនបើប្រធានក្លិប Paris Saint Germain មិនអាចដោះស្រាយបញ្ហាដែលកំពុងតែ​បង្កភាពស្មុគស្មាញនាពេលបច្ចុប្បន្ននេះបានប្រសើរទេនោះ។ ម្យ៉ាងវិញទៀត តាមរយៈការស្នើរបស់ Neymar ផ្ទាល់ទាក់ទងនឹងការផ្ទេរ Cavani នេះដែរ អាចបញ្ជាក់យ៉ាងច្បាស់ថា ខ្សែប្រយុទ្ធអ៊ុយរ៉ាហ្គាយរូបនេះ មិនអាចបន្តនៅ League1 បានយូរទៀតឡើយ។

យ៉ាងណាវិញ ក្រុម Chelsea, Everton , Tottenham, Arsenal និង Napoli បានបើកទ្វារចាំទទួល ខ្សែប្រយុទ្ធរូបនេះយ៉ាងកក់ក្តៅ បំផុត។ ក្នុងនោះដែរ Chelsea ,Everton Arsenal និង Tottenham ពិតជាចង់បានខ្សែប្រយុទ្ធ Edinso Cavani ខ្លាំងណាស់ ដើម្បីយកមកពង្រឹងបន្ថែមនៅតំបន់ប្រយុទ្ធ ឲ្យកាន់តែរឹងមាំ ជាងមុនទៅទៀត។ ក៍ប៉ុន្តែ Napoli អាចក្លាយជាក្រុមដែលមានសង្ឃឹម ច្រើនជាងគេ ព្រោះថា Cavani ជាអតីតកីឡាកររបស់ក្លិបអ៊ីតាលីនេះស្រាប់ ហើយ Cavani ក៍ដុះពន្លកចេញពី Napoli ដែរ ដែលទំនងជា កីឡាកររូបនេះ យកគម្រូតាម Rooney ដែលវិលទៅរកក្លិប​ចាស់របស់ពួកគេវិញ។

ដូច្នេះហើយ បើទោះបីជា Edinson Cavani ត្រូវបានក្រុម Paris Saint Germain លក់ចេញក៍ដោយ ក៍មិនខ្វះក្រុមខ្លាំងៗ ដែលចាំទទួល​ខ្សែប្រយុទ្ធរូបនេះឡើយ។