រឿងរ៉ាវ ដែលកំពុងបង្កភាពរ៉ាំរ៉ៃ​​ ចំពោះក្រុម Paris Saint Germain ពេលនេះ បានឈានដល់ការដោះស្រាយរួចរាល់​ជាស្ថាពរហើយ ក្រោយពីខ្សែប្រយុទ្ធតម្លៃថ្លៃកប់ពពក Neymar បានចេញមុខសុំទោស ចំពោះ Edinson Cavani ចំពោះហេតុការណ៍ នាពេលកន្លងមក។

ជាការពិតណាស់ តាមរយៈ Instagram ផ្ទាល់ របស់ ខ្សែប្រយុទ្ធប្រេស៊ីលរូបនេះ បានចេញមុខសុំទោស​ ចំពោះ Cavani នូវរឿងរ៉ាង​ មិនល្អនាពេលកន្លងមក។ ម្យ៉ាងវិញទៀត រូបភាព​ដែលថតបាន​ ពីទីលានហ្វឹកហាត់របស់ក្រុម Paris Saint Germain បានបង្ហាញឲ្យឃើញថា ទំនាក់ទំនងរវាង Neymar និង​ Cavani មិនមានភាពប្រែប្រួលឡើយ គឺដូច​គ្មានអ្វីកើតឡើងអ៊ីចឹង។ ជាក់ស្តែងណាស់ ភាពចម្រូងចម្រាស់ ត្រូវបានបញ្ចប់នេះ​ ដោយសារតែ Neymar បានសុំទោស Cavani ចំពោះបញ្ហានេះ ព្រោះ​ថា Neymar បានយល់ច្បាស់ពីអ្វីដែលជាកំហុសរបស់គេ ក្នុងជំនួបជាមួយក្រុម Lyon កន្លងមក។ យ៉ាងណាវិញ ការបន្ទាបឥរិយាបថ របស់ Neymar នេះដែរ បានដោះ ស្រាយបញ្ហា ដែលកំពុងកើតឡើងត្រឹមមួយគ្រាប៉ុណ្ណោះ ខណៈ ការប្រកួតក្រោយៗមកទៀត កីឡាករទាំង២​ អាចនឹងមានការខ្វែងគំនិតគ្នា ចំពោះការទាត់បាល់ពិន័យ ទាំង ១១ម៉ែត្រ និងបាល់ពិន័យក្រៅប្រអប់គ្រោះថ្នាក់។

ហេតុនេះហើយ មានតែក្លិប Paris Saint Germain ប៉ុណ្ណោះ ដែលត្រូវតែកំណត់ឲ្យបានច្បាស់ នូវតួនាទីរបស់​កីឡាករទាំង២រូបនេះ ដើម្បីកុំឲ្យមានបញ្ហា ដូចពេលនេះទៀត។ ចាំមើលថា Neymar និង Cavani អាចសហការគ្នា បានយ៉ាងល្អដូចមុនពេល កើតមានជម្លោះ នេះឬយ៉ាងណា?