ក្រុមកាំភ្លើងធំ Arsenal កាន់តែឈានដល់ការបាត់បង់​កីឡារឆ្នើម ២រូបគឺ Mezut Ozil និង Alexis Sanchez ក្នុងការដោះដូរទីផ្សារលើកទី២​ក្នុងខែមករា​ខាងមុខនេះ ដែលធ្វើឲ្យក្លិបអង់គ្លេសមួយនេះ ត្រូវតែស្វែង​រកកីឡាករថ្មីមកបំពេញកន្លែងដែលត្រូវបាត់បង់នេះ។

ជាក់ស្តែងណាស់ បើតាមការចុះផ្សាយចុងក្រោយនេះ របស់​ Independent បានឲ្យដឹងថា ក្រុម Arsenal បានយល់ព្រមលក់ Ozil ឲ្យក្រុម Inter Milan ហើយដើម្បី​កុំឲ្យកីឡាករអាឡឺម៉ង់នេះដើរចេញដោយគ្មានតម្លៃខ្លួន។ ក៍ប៉ុន្តែប្រភពខាងលើ ហាក់មិនបានបង្ហើបឲ្យដឹងច្បាស់ពីតម្លៃពិតប្រាកដណាមួយ​នៅឡើយទេ​ ដែលទំនងជា Arsenal ចង់បានតម្លៃត្រឹមខ្ទង់ ៤០លានផោនមកវិញ តែមិនប្រាកដឡើយ ដែល Inter Milan ហ៊ានចំណាយទឹកប្រាក់យ៉ាងច្រើនគួរសមនេះ។ ម្យ៉ាងវិញទៀត​ Alexis Sanchez ក៍កំពុងតែត្រៀមចាកចេញទៅកាន់ក្រុម Paris Saint Germain ផងដែរ ដែលកាន់តែធ្វើឲ្យ Arsenal ប្រឈមមុខយ៉ាងខ្លាំង។

យ៉ាងណាវិញ ខ្សែប្រយុទ្ធចំណូលថ្មីបារាំង Alexandre Lacazette បានបរាប់លោក Arsene Wenger ថា រូបគេកំពុងតែទាក់ទងមិត្តរួមជាតិ Antonie Griezmann ឲ្យចាកចេញពីក្រុម Atletico Madrid មកចូលរួមជាមួយ Arsenal នៅខែមករាខាងមុខនេះ។ ជាការពិតណាស់ Griezmann កំពុងតែត្រូវបានក្លិបធំៗជាច្រើន ទាក់ទងឲ្យ​ទៅចូលរួមជាមួយពួកគេ ដូចជា Man Utd, Real Madrid, Barcelona, Chelsea និងចុងក្រោយនេះទំនង​ជា Arsenal ផងមិនដឹង។

ដូច្នេះហើយ តាមរយៈទំនាក់ទំនងរបស់ Lacazette រូបគេនឹងពកយាយាមលួងលោម Griezmann ឲ្យផ្លាស់មក Arsenal ឲ្យបាន។Griezmann នៅមិនទាន់ច្បាស់ថា ទៅណាឡើយ ហើយប្រហែលជា Arsenal មិនមែនជាជម្រើសសម្រាប់​កីឡាកររូបនេះឡើយ ព្រោះថា រូបគេមិនមានបំណងចង់មក​លេងនៅ Premier League ឡើយ។