ខ្សែប្រយុទ្ធស្លាបហូរឡង់ Arjen Rubben បានសម្រេចចិត្តយ៉ាងច្បាស់ហើយថា រូបគេនឹងមិនបន្តកុង​ត្រាថ្មីជាមួយក្រុម Bayern Munich ទៀតឡើយ ខណៈកុងត្រារបស់កីឡាករហូរឡង់រូបនេះ នឹងអស់សុពល​ភាព នៅឆ្នាំក្រោយនេះ។

បើតាមការឲ្យដឹងពី Sky Sports បានឲ្យដឹងថា ខ្សែប្រយុទ្ធ​ស្លាប់ហូរឡង់វ័យ៣៣ឆ្នាំ Arjen Rubben នឹងចូលនិវត្តន៍​ហើយក្រោយពីកុងត្រារបស់កីឡាកររូបនេះ ត្រូវបានបញ្ចប់នៅឆ្នាំក្រោយនេះ។ អតីតកីឡាកររបស់ក្រុម តោខៀវ Chelsea និងស្តេចស Real Madrid រូបនេះ បាននឿយណាយពីវិស័យបាល់ទាត់ហើយ ដែលរូបគេចង់សម្រាកម្តង ដើម្បីទុកឱកាសឲ្យយុវជន​ជំនាន់ក្រោយលេងម្តង។​ ម្យ៉ាងវិញទៀតនោះ Rubben បានសោកស្តាយយ៉ាងខ្លាំង ដែលមិនអាចជួយក្រុមជម្រើសជាតិហូរឡង់ ឲ្យឡើងទៅកាន់វគ្គចែកពូល World Cup ២០១៨ បាន ដែលនេះគឺជារឿងដ៍ឈឺចាប់បំផុតដែលរូបគេមិនអាចនាំ​ក្រុមជម្រើសជាតិលេងក្នុងព្រឹត្តិការណ៍ដ៍សំខាន់ក្នុងឱកាស​ចុងក្រោយរបស់គេ។

យ៉ាងណាវិញនោះ Bayern Munich មានបំណងចង់បន្តកុងត្រាថ្មី ១ឆ្នាំទៀត ជាមួយ Rubben តែកីឡាកររូបនេះ បានប្រាប់ Sky Sports ថា រូបគេសម្រាកហើយ នឹងមិនបន្តលេងបាល់ទាត់ទៀតឡើយ ព្រោះថាទម្រាំដល់ឆ្នាំក្រោយ រូបគេមានវ័យ ៣៤ឆ្នាំហើយ ល្មមដល់ពេលដែលរូបគេត្រូវចាកចេញពីពិភពដ៍ល្បីល្បាញ​នេះហើយ។ មិនត្រឹមតែក្លិប Bayern Munich ទេដែលចង់បាន Rubben សូម្បីតែក្លិបនៅចិន និងនៅហូរឡង់​ ក៍ចង់បានកីឡាករវ័យចំណាស់រូបនេះដែរ តែ Rubben បានបដិសេធ មិនទៅលេងទាំងអស់។

ដូច្នេះហើយ អ្នកគាំទ្របាល់ទាត់ទាំងអស់នឹងលែងបានឃើញវត្តមានតារាដ៍ឆ្នើម Arjen Rubben នៅឆ្នាំក្រោយនេះហើយ ក្រោយពីកីឡាកររូបនេះ សម្រេចចិត្តចូលនិវត្តន៍ ពីវិស័យបាល់ទាត់។