ក្រុមកំពូលតារាង League1 របស់បារាំង Paris Saint Germain បានចូលខ្លួនមកប្រជែងក្រុមកំពូលតារាង Laliga អេស្ប៉ាញ Barcelona ក្នុងការទិញយកខ្សែបម្រើ​ប្រយុទ្ធប្រេស៊ីល Philippe Coutinho ពីក្រុមហង្សក្រហម​ Liverpool ។

ស្ងាត់ៗ ក្រុមអ្នកមានបារាំង បានធ្វើនូវរឿងដ៍ភ្ញាក់ផ្អើលមួយ ដែលមានការចាប់អារម្មណ៍យ៉ាងខ្លាំង ពីសំណាក់អ្នកតាមដានបាល់ទាត់ ទាំងអស់។ ជាក់ស្តែងណាស់ បើតាម TF1 ក្នុងប្រទេសបារាំង បានឲ្យដឹងថា ក្រុម Paris Saint Germain បានតាមប្រ​មាញ់ កីឡាករប្រេស៊ីល Philippe Coutinho ពីក្រុម​ហង្ស​ក្រហម Liverpool ក្នុងតម្លៃ មិនចាញ់ក្រុម Barcelona នោះឡើយ។ ការចូលខ្លួនមកតាមទិញ Coutinho នេះដែរ វាអាចប៉ះពាល់ដល់ ក្រុម FC Barcelona ដែលកំពុងតែ​តាមទិញ កីឡាកររូបនេះ ជាច្រើនខែ កន្លងមកហើយ។

យ៉ាងណាវិញ Paris Saint Germain ហាក់ដូចជា មិនខ្វាយខ្វល់ ពីក្រុម Barcelona ឡើយ ដោយក្រុមបារាំង​មួយនេះ បានដាក់គោលដៅច្បាស់ហើយងថា នឹងទិញ Coutinho ឲ្យបាន នៅរដូវក្តៅខាងមុខនេះ។ ការចាប់អារម្មណ៍ Coutinho នេះដែរ ទំនងជា Paris Saint Germain ចង់យកកីឡាករប្រេស៊ីលរូបនេះ មកចាប់ដៃគូជាមួយនឹងមិត្តរួមក្រុម របស់គេ​ Neymar ដែល PSG បានទិញកាលពីរដូវក្តៅកន្លងមក ដែលកីឡាកររូបនេះ មានទំនាក់ទំនងល្អជាមួយគ្នា ព្រមទាំងលេងស៊ីចង្វាក់គ្នាផងដែរ។

ដូច្នេះហើយ Paris Saint Germain មិនខ្វល់ពី អារម្មណ៍របស់ Coutinho ដែលចង់ទៅលេងឲ្យក្រុម Barcelona ក៍ដោយ ដែលក្រុម​ PSG នឹងប្រើទំនាក់ទំនងរបស់គេ ជាមួយ Neymar ដើម្បីទាក់ទាញទឹកចិត្ត Philippe Coutinho ឲ្យងាកទៅរក League1 វិញ ជាជាងការចាប់អារម្មណ៍ទៅ​លើក្រុម Barcelona នៅ Laliga របស់អេស្ប៉ាញ។​ រង់ចាំមើលថា តើសង្រ្គមរវាងក្រុម Paris Saint Germain និងក្រុម Barcelona ក្នុងការដណ្តើម Philippe Coutinho តើក្រុមណាមួយជាអ្នកទទួលបានជ័យជម្នះ?