ខ្សែប្រយុទ្ធបារាំង​ Antonie Griezmann បានឆ្លើយប្រាប់​ពីមូលហេតុចម្បងមួយ ដែលរូបគេបានបដិសេធ ការផ្លាស់ទៅកាន់ក្រុម បីសាចក្រហម Manchester United កាលពីរដូវក្តៅកន្លងមកនេះ។

បើតាមការចុះផ្សាយរបស់ Independent បានឲ្យដឹងថា​ Griezmann មិនមែនមិនចង់ទៅលេងឲ្យក្រុមបីសាច ក្រហម Manchester United ឡើយ តែមានហេតុផល​មួយ ដែលរូបគេមិនចង់ចាកចេញពីក្រុម Atletico Madrid នោះ។ ជាក់ស្តែងណាស់ ការមិនចាកចេញពីអេស្ប៉ាញ កាលពីរដូវក្តៅកន្លងមក ដោយសារតែ Atletico Madrid បានរងនូវការពិន័យ ពីសហព័ន្ធបាល់ទាត់អេស្ប៉ាញ មិនឲ្យទិញកីឡាករចូល​ឡើយ ដោយត្រូវរង់ចាំដល់ខែមករាសិន ទើបអាចទិញបាន។

ហេតុនេះហើយ បើទោះបីជា Griezmann ចង់មកលេងឲ្យ Man Utd ក៍ដោយតែកីឡា​កររូបនេះ មិនអាចចាកចេញ ក្នុងពេលនោះបានឡើយ ព្រោះថា បើ Griezmann ចាកចេញ រូបនេះ អាចធ្វើឲ្យ Atletico Madrid កាន់តែដុនដាប ដោយសារតែ មិនអាច​ទិញកីឡាករបានហើយ កីឡាករក្នុងក្លិបរត់ចោលទៀតនោះ។ យ៉ាងណាក៍ដោយ សម្រាប់ខែមករាខាងមុខនេះ Antonie Griezmann អាចស្វែងរកទ្រនុំថ្មី បានហើយ ក៍ប៉ុន្តែ ខណៈពេលនេះ កីឡាករបារាំងរូបនេះ ប្រហែលជាមិនផ្លាស់ទៅលេងឲ្យក្រុម​បីសាចក្រហម Manchester United ឡើយ ដែលតាមរយៈ ពត៌មានល្ហិចល្ហៀង កន្លងមក ប្រហែលជា Griezmann អាចផ្លាស់ទៅកាន់ Paris Saint Germain ព្រោះថា Griezmann ចង់ចាប់ដៃគូលេងជាមួយ Neymar និង Kylian Mbappe ។​

ដូច្នេះហើយ ការសម្រេចចិត្ត មិនចាកចេញពី Atletico Madrid កាលពីរដូវក្តៅកន្លងមក គឺជាទង្វើដ៍ល្អមួយ ដែល Antonie Griezmann បានធ្វើទៅលើក្លិបមួយផ្តល់កំណើតយ៉ាងល្អ ដល់រូបគេ នៅពេលដែលក្លិបកំពុងតែយ៉ាប់យឺននោះ។