បន្ទាប់ពីខ្សែប្រយុទ្ធប្រេស៊ីល Neymar បានយល់ព្រមក្នុ​​ង​ការសម្បទាន បាល់១១ម៉ែត្រត្រឡប់ទៅឲ្យមិត្តរួមក្រុម Edinson Cavani វិញនោះ បង្ហាញឲ្យឃើញថា Neymar ពិតជាកីឡាករដ៍ល្អមួយរូបដែលមិនចង់មក​ដណ្តើមតំណែងរបស់អ្នកណាម្នាក់ឡើយ នៅ Paris Saint Germain ។

ជាក់ស្តែងណាស់ ក្នុងការប្រកួតជាមួយក្រុម Troyes យប់មិញនេះ ក្រុម Paris Saint Germain បានបន្តយកឈ្នះ ក្នុងលទ្ធផល ២-០ បន្តទៀត។ ក៍ប៉ុន្តែ អ្វីដែលជារឿងគួរឲ្យចាប់អារម្មណ៍នោះ មានការទាត់បាល់ ១១ម៉ែត្រ១គ្រាប់នៅនាទីទី៤១ ដែលក្រុម Paris Saint Germain ធ្វើមិនបានសម្រេចឡើយ។ ក៍ប៉ុន្តែ មិនមែនជា Neymar ឡើយដែលទាត់បាល់នេះ Cavani វិញទេ ដែលធ្វើមិនបានសម្រេចគ្រាប់បាល់នេះ។ ទាក់ទងទៅនឹងការប្រគល់បាល់ ១១ម៉ែត្រឲ្យទៅ Cavani វិញនេះ ពិតជារឿងដ៍ភ្ញាក់ផ្អើលមួយ ព្រោះថា កាលពីដើមរដូវ​កាលកន្លងមក តំណែងអ្នកទាត់បាល់ ១១ម៉ែត្រនេះ បានបង្កនូវភាពរកាំរកូសរវាង Cavani និង Neymar ។

ម្យ៉ាងវិញទៀតនោះ ម្ចាស់ក្លិប Paris Saint Germain បានរកដំណោះស្រាយដ៍ល្អមួយ តាមរយ:ការផ្តល់លុយ ១លានអឺរ៉ូ ដល់ Cavani ដើម្បីសម្បទានបាល់ ១១ម៉ែត្រទៅឲ្យ Neymar ផងដែរ។ យ៉ាងណាវិញ សម្រាប់យប់មិញនេះ Neymar បានយល់ព្រម ផ្តល់បាល់ ១១ម៉ែត្រត្រឡប់ទៅឲ្យ Cavani វិញ តែខ្សែប្រយុទ្ធអ៊ុយរ៉ាហ្គាយរូបនេះ បែរជាធ្វើឲ្យរបូតគ្រាប់បាល់នេះវិញ។ ក៍ប៉ុន្តែ Paris Saint Germain នៅតែអាចរកគ្រាប់បាល់បាន២ គ្រាប់វិញដដែល ដោយការស៊ុតរបស់ Neymar នៅនាទីទី៧៣ ខណ: Cavani អាចរកគ្រាប់បាល់សងវិញ នៅនាទីទី ៩០ តាមរយ:ការបញ្ជូនបាល់យ៉ាងល្អ របស់ Neymar ។

ដូច្នេះហើយ ការប្រគល់បាល់ ១១ម៉ែត្រ ទៅឲ្យ Cavani ស៊ុតវិញនេះ គឺជារឿងដ៍ល្អមួយ ដែល Neymar ចង់បញ្ចប់ភាពល្អក់កករ ក្នុងចិត្តរបស់មិត្តរួមក្រុម នាពេល​កន្លងមក តែអ្វីដែលមិនដូចចិត្តវិញនោះ គឺ Cavani បែរជាស៊ុតមិនចូលវិញ។

//www.youtube.com/watch?v=atnjrUzgG_s