បន្ទាប់ពីប្រកួតចាញ់ក្រុម Barcelona ១-០ កាលពីយប់រំលងអាធ្រាត្រថ្ងៃអាទិត្យ កន្លងមកនេះ បានធ្វើ​ឲ្យលោក Diego Simeone គ្រូបង្វឹកក្រុម Atletico Madrid បានលើកសរសើរ ពីខ្សែប្រយុទ្ធអាហ្សង់ទីន Lionel Messi យ៉ាងពេញទំហឹង។

ជាក់ស្តែងណាស់ តាមការចុះផ្សាយរបស់កាសែត AS ដែលបានដកស្រង់សម្តីលោក Diego Simeone ក្រោយចប់ការប្រកួតចាញ់ក្រុម Barcelona បានឲ្យដឹងថា គ្រូបង្វឹកក្រុម Atletico Madrid រូបនេះ បានកោតសរសើរពីសមត្ថភាព Lionel Messi រកកីឡាករប្រដូចមិនបានឡើយ។ លោក Diego Simeone បាននិយាយថា សមត្ថភាពរបស់ Messi តែម្នាក់ គឺពិបាកបិទខ្លាំងណាស់ ពោលគឺខ្លាំងជាងតារា​ឆ្នើមទាំង៣រូបរបស់ Real Madrid គឺ Cristiano Ronaldo, Karim Benzema និង Gareth Bale ទៅទៀត។

ជាការពិតណាស់ លោក Simoene បានមើលឃើញចំណុចពិសេសជាច្រើនរបស់ Messi មិនត្រឹមតែបច្ចេកទេស បណ្តើរបាល់, ការបោះបាល់ឆ្ងាយជិត, ការរត់យ៉ាងលឿន ជាមួយនឹងការអូសបាល់កាត់កីឡាករជាច្រើនរូប រួមទាំងការទាត់បាល់ Free kick ដ៍ល្អឥតខ្ចោះ របស់ Messi គឺពិតជាល្អខ្លាំងណាស់ ដែល Ronaldo, Benzema និង Bale របស់ Real Madrid មិនអាចធ្វើ​បានដូចឡើយ។

Simoene បានឲ្យដឹងបន្ថែមទៀតថា ក្នុងការប្រកួតជាមួយ Barcelona ម្តងៗ កីឡាកររបស់ពួកយើង ពិបាកបិទ Lionel Messi ណាស់ ព្រោះថាកីឡាកររូបនេះ មានបច្ចេកទេសល្អ ដែលធ្វើឲ្យកីឡាករយើង ៣-៤នាក់ពិបាកបិទ។ ចំណែកការប្រកួតជាមួយ Real Madrid វិញ ថ្វីបើ Ronaldo, Benzema និង Bale លឿន និងមានបច្ចេក​ទេសរៀងៗខ្លួនល្អមែន តែមិនសូវផ្តល់ភាពគ្រោះថ្នាក់ដល់​ពួកយើងឡើយ ខុសពី Messi ផ្តល់ភាពគ្រោះថ្នាក់ដល់​ពួកយើង គ្រប់ពេលដែលបាល់នៅលើជើងរបស់កីឡាករ​រូបនេះ។

ដូច្នេះហើយ លោក Diego Simoene បានមើលឃើញថា​ Lionel Messi ម្នាក់សោះ គឺគ្រោះ​ថ្នាក់ជាង BBC របស់ Real Madrid ដែលរួមមានដូចជា Cristiano Ronaldo, Karim Benzema និង Gareth Bale ទៅទៀត។