នាយកប្រតិបត្តិក្រុម Paris Saint Germain លោក Antero Henrique បានបដិសេធ លក់ខ្សែប្រយុទ្ធប្រេស៊ីល​ Neymar ឲ្យក្រុម Real Madrid នៅរដូវកាលក្រោយនេះ។

តាមរយៈពត៌មានចុងក្រោយ ដែលចុះផ្សាយដោយ The Goal បានឲ្យដឹងថា លោក Antero Henrique នាយកក្លិប Paris Saint Germain បានសម្រេចមិនលក់ Neymar ចេញឡើយ បើទោះបីជា​ក្រុម Real Madrid នៅតែទទូចចង់បានកីឡាកររូបនេះ ក៍ដោយ។ នេះមិនមែនជាលើកទី១ ឡើយដែលក្រុម Paris Saint Germain ចេញមុខបដិសេធលក់ Neymar ឲ្យ Real Madrid នោះ ក៍ប៉ុន្តែ ខាងក្រុម Real Madrid ហាក់មិនខ្វល់ចំពោះការបដិសេធនេះ​ឡើយ ដោយបានបន្តព្យាយាមតាមចែចង់ Neymar ជាច្រើនលើកច្រើនសារ។

យ៉ាងណាវិញ លោក Antero Henrique បាននិយាយយ៉ាងច្បាស់ហើយថា លោកមិន​លក់ Neymar ឡើយមិនថា Real Madrid ឲ្យតម្លៃ​ខ្លួន​ទំហំប៉ុណ្ណាក៍ដោយ។ ប្រភពខាងលើដដែល បានឲ្យដឹងបន្ថែមទៀតថា ការសម្រេចមិនលក់ Neymar នេះដែរ មិនមែនដោយសារតែលោក Antero Henrique ខឹង Real Madrid ដែលបានបំបាក់ ក្លិបបារាំងមួយនេះ ៣-១ កាលពីជើងទី១ ឡើយ ដោយសារតែក្លិបមួយនេះ ចង់រក្សាទុក Neymar ដើម្បីឈ្នះពាន Champion League ដែលជាបំណងដ៍ធំរបស់ក្លិបមួយនេះ និងការចង់ជួយឲ្យ Neymar ឈ្នះ Balon D’Or ជាមួយ Paris Saint Germain បន្ទាប់ពីម្ចាស់ឧបត្ថម្ភដ៍ធំ គឺក្រុមហ៊ុន Nike ត្រៀមផ្តល់រង្វាន់ ១ លានដុល្លាដល់ Neymar នៅពេលឈ្នះពាន Balon D’Or ជាមួយក្លិប​បារាំងមួយនេះ។

ហេតុនេះហើយ ដើម្បីបំពេញតម្រូវការ​ម្ចាស់ឧបត្ថម្ភដ៍ធំ រួមនឹងមហិច្ចតាក្លិបផងនោះ ជាហេតុធ្វើ​ឲ្យក្រុម Paris Saint Germain មិនលក់ Neymar ឲ្យក្រុម Real Madrid ឡើយ។