គ្រូបង្វឹកក្រុម សេះបង្កង់ Juventus បានចេញមុខបដិសេធ ចំពោះពាក្យចរចាម​អារាមជាច្រើន ទាក់ទងជាមួយនឹងការផ្ទេរខ្សែប្រយុទ្ធវ័យក្មេងអាហ្សង់ទីន Paulo Dybala ទៅកាន់ក្រុមនៅប្រទេសអេស្ប៉ាញ។

បើតាមការចុះផ្សាយរបស់កាសែត Marca ពីប្រទេសអេស្ប៉ាញ បានឲ្យដឹងថា លោក Massimiliano Allegri គ្រូបង្វឹកក្រុម Juventus មិនមានបំណងលក់​ Paulo Dybala ឡើយ នៅរដូវក្តៅខាងមុខនេះ។ ក្នុងនោះដែរ លោក Allegri បាន​បដិសេធ ចំពោះពាក្យចរចាមអារាមមួយ ដែលបាននិយាយថា ក្លិបបានយល់ព្រមលក់ Dybala ទៅឲ្យក្រុម Atletico Madrid មិនតែប៉ុណ្ណោះ រវាងក្លិបទាំង២នេះដែរ បានឈានទៅដល់ការយល់ព្រម ចុះកុងត្រា ៥ឆ្នាំជាមួយ ក្លិបអេស្ប៉ាញមួយនេះផងដែរ។

គ្រូបង្វឹកអ៊ីតាលីរូបនេះ បានបន្តទៀតថា Dybala ជាកីឡាករសំខាន់របស់ក្លិប ម្យ៉ាងរូបគេសប្បាយចិត្តក្នុងការលេងនៅអ៊ីតាលី ជាជាងការផ្លាស់ទៅកាន់ក្លិបថ្មី ជាងនេះទៅទៀត នៅរដូវក្តៅខាងមុខនេះ Juventus មានបំណងចង់យកកីឡាករមកពង្រឹងក្លិបបន្ថែម ខណ:ការលក់​កីឡាករវិញនោះ ប្រហែលជាមិនអាចកើតមានឡើយ។

គួរបញ្ជាក់ផងដែរថា Paulo Dybala កំពុងទទួលបានការចាប់អារម្មណ៍ជាច្រើនពីក្លិបបាល់ទាត់ធំៗ នៅអឺរ៉ុប មានទាំងក្រុមបីសាចក្រហម Manchester United, Real Madrid, Barcelona និង Atletico Madrid កំពុងប្រជែងគ្នាចង់បានកីឡាករ​អាហ្សង់ទីន​រូបនេះ។