បន្ទាប់ពី Gerrard Pique កាន់តែមានវ័យចំណាស់ទៅហើយនោះ ក្រុម Barcelona ត្រូវការស្វែងរកខ្សែការពារកណ្តាលថ្មីមួរូបទៀត ដើម្បីត្រៀមជំនួស​តំណែងរបស់ខ្សែការពារអេស្ប៉ាញរូបនេះ។

បើតាមការចុះផ្សាយរបស់ Daily Star បានឲ្យដឹងថា ក្រុមយក្សអេស្ប៉ាញ Barcelona កំពុងតែសម្លឹងឃើញឃើញខ្សែបម្រើការពារស្លាប Marcos Alonso របស់ក្រុមតោខៀវ Chelsea យកមកជំនួសតំណែងរបស់ខ្សែការពារ​កណ្តាល Gerrard Pique ។ ថ្វីបើទម្រង់លេងខុសគ្នាមែន តែក្រុម Barcelona ជឿជាក់ថា Alonso អាចលេងការពារកណ្តាលបាន ដែលប្រហែលជាការលេងក្នុង​តំណែងថ្មីនេះ នឹងប្រសើរជាងមុនផងដែរ សម្រាប់ Alonso ។

តាមប្រភពខាងលើ ដដែលបានឲ្យដឹងទៀតថា Barcelona បានរៀបចំឯកសារគ្រប់គ្រាន់ហើយ ដើម្បីចរចារជាមួយ Chelsea ក្នុងការផ្ទេរយក Alonso មកកាន់ Laliga ដើម្បីឲ្យ​កីឡាកររូបនេះ មានឱកាសផ្ស៊ាំជាមួយនឹងការលេងនៅទីនេះ។ យ៉ាងណាវិញ ខាងភាគី Chelsea នៅមិនទាន់មានប្រតិកម្មតបនៅឡើយទេ​ ចំពោះបញ្ហានេះ ក៍ប៉ុន្តែ ការលក់ Marcos Alonso អាចទៅរួចប្រសិនបើ Barcelona ហ៊ានផ្តល់​តម្លៃខ្ពស់គួរសម និងផ្តល់លក្ខខណ្ឌល្អមួយចំនួនដល់ក្រុម Chelsea នោះ។

Marcos Alonso ទើបតែមានវ័យ២៧ឆ្នាំប៉ុណ្ណោះ ដែលអនាគត់របស់គេអាចនៅ​វែងឆ្ងាយទៀត ចំណែក Gerrard Pique វិញ មានវ័យ៣១ឆ្នាំហើយ នៅមនដល់ ២-៣ឆ្នាំទៀត ច្បាស់ជា Barcelona មិនទុកឡើយ ជាក់ដូច​ Andres Iniesta ជាសក្ខីកម្មស្រាប់។