បន្ទាប់ពីការចាកចេញរបស់ Ronaldo ទៅកាន់ក្រុមសេះបង្កង់ Juventus រួចមក Real Madrid នៅមិនទាន់រកកីឡាករជំនួសបានឡើយ ខណៈ Gareth Bale ត្រូវបានគេរំពឹងថា នឹងជំនួសតំណែងនេះ។

យ៉ាងណាវិញ បើតាមការចុះផ្សាយរបស់ The Goal បានឲ្យដឹងថា​ ខ្សែបម្រើ​ប្រយុទ្ធអេស្ប៉ាញ Marco Asensio ត្រូវបានគេរំពឹងថា នឹងក្លាយជាកីឡាករដែល​ជំនួសតំណែងរបស់ Ronaldo នារដូវកាលនេះ។ ក្នុងនោះដែរ Asensio កំពុងតែដើរតាមគន្លងកីឡាករកំពូល Lionel Messi ពោលលែងក្លាយជា​ស្រមោលរបស់ កីឡាកររូបណាទៀត ហើយចាប់ផ្តើមសាងភាពល្បីល្បាញដោយ​ខ្លួនឯង។ គួរបញ្ជាក់ផងដែរថា Messi ដំបូងឡើយលេងបម្រុងប៉ុណ្ណោះ ដោយសារវត្តមានរបស់ Ronaldinho តារាឆ្នើមប្រេស៊ីលជារបាំង​រារាំងកីឡាករ​អាហ្សង់ទីនរូបនេះ។

រហូតដល់ពេល Ronaldinho ចាកចេញពី Barcelona ជាឱកាសមួយ​ធ្វើឲ្យ Messi សាងភាពល្បីល្បាញបានរហូតមកទល់បច្ចុប្បន្ននេះ។ ក្រឡេកមើល Asensio ពេលនេះវិញ ក្រោយការចាកចេញរបស់ Ronaldo កីឡាករអេស្ប៉ាញ​រូបនេះ ចាប់ផ្តើមឡើងកូដក្រឺតក្រឺត ម្យ៉ាងតារាវ័យ២២ឆ្នាំរូបនេះ នឹងក្លាយជា Ronaldo ថ្មីរបស់ Real Madrid ផងដែរ។

ដូច្នេះហើយ Marco Asensio មិនខុសពី Lionel Messi ឡើយ ក្រោយការចាកចេញរបស់ Ronaldo រូបគេនឹងមានឱកាសថ្មីក្នុងការកសាងកេរ្តិ៍​ឈ្មោះឲ្យល្បីល្បាញក្នុងវិស័យបាល់ទាត់ជាក់ជាមិនខាន។