កីឡាករ Diego Costa បានបង្ហាញគោលបំណងថាចង់នៅក្លឹប Chelsea បន្ដទៀត មិនទាន់ចង់ចាកចេញទៅលេងនៅក្លឹប Atletico Madrid នៅប្រទេសអេស្ប៉ាញវិញនៅឡើយទេ។

បើតាមរបាយការណ៍នៅពេលថ្មីៗនេះ បានបញ្ជាក់ថា Costa ត្រូវបង្ខំចិត្តចាកចេញពីអង់គ្លេសទៅលេងនៅអេស្ប៉ាញជាមួយក្លឹបចាស់ AT Madrid វិញ នៅរដូវកាលថ្មីខាងមុខនេះ ដោយសារតែលោក Antonio Conte គ្រូបង្វឹកថ្មីរបស់តោខៀវមិនពេញចិត្តទម្រង់លេងរបស់គេឡើយ។

យ៉ាងណាមិញ ឆ្លើយតបនឹងពាក្យមិនពិតនេះ ខ្សែប្រយុទ្ធសញ្ជាតិអេស្ប៉ាញផងនិងប្រេស៊ីលផងរូបនេះ បានបញ្ជាក់ពីអនាគតរបស់គេថាមិនទៅណាចោលអង់គ្លេសឡើយ។ នេះមានន័យថារូបគេនឹងនៅជាមួយ Chelsea បន្ដទៀត ដើម្បីប្រកួតប្រជែងយកជម្រើស១១នាក់ដំបូង ក៏ដូចជាជួយក្រុមប្រជែងយកជើងឯកលីគកំពូល English Premier League ផងដែរ។

កីឡាករវ័យ២៧ឆ្នាំខាងលើផ្លាស់មកលេងនៅអង់គ្លេសកាលពីឆ្នាំ ២០១៤កន្លងទៅ ក្នុងតម្លៃខ្លួន៣២លានផោន ហើយក្នុងរដូវកាលនោះដែររូបគេបានជួយក្រុម Chelsea បានច្រើនដោយឈ្នះទាំងពានរង្វាន់លីគកំពូលអង់គ្លេសផងដែរ ក្រោមការដឹងនាំរបស់លោក Jose Mourinho ។ តែរដូវកាល២០១៥កន្លងទៅនេះហើយ ទើបរូបគេធ្លាក់ទម្រង់លេងដោយសារតែមានរបួសច្រើន ហើយក៏មានដំណឹងថាមានក្លឹបចង់បានរូបគេទៅទៀត៕