Wednesday, ទី11 February, ឆ្នាំ2015 07:41 am
ខេត្តសៀមរាប៖តាមសេចក្ដីរាយការណ៍ពីភ្នាក់ងារបានអោយដឹងថាបទល្មើសព្រៃឈើបានចរាចរយ៉ាងរលូនដឹកតាមរថយន្ដសាំងយ៉ុងនិងយីឌុបប្រមាណ១០គ្រឿងនិងរថយន្ដតាកូម៉ា១បាំងកន្លះប្រមាណ១០គ្រឿងផ្សេងទៀតចេញពីឃុំស្រយង់ឆ្ពោះទៅកាន់ស្រុកស្វាយលើខេត្តសៀមរាបដោយគ្មានការបង្ក្រាបទប់ស្កាត់ពីសមត្ថកិច្ចនោះទ្បើយ។
ប្រភពព័ត៌មានពីប្រជាពលរដ្ឋក្នុងមូលដ្ឋានបានអោយដឹងថាប្រភពឈើប្រណីតនិងឈើជ្រាយប្រភេទដួងចែម,ផ្តៀក,គគីរ,សុក្រំដឹកចេញពីស្រុកសង្គមថ្មីនិងឃុំត្បែង២ស្រុកគូលែនខេត្តព្រះវិហារនិង១ភាគធំទៀតជនខិលខូចកាប់បំផ្លាញព្រៃឈើនៅតាមតំបន់ភ្នំត្បែងមានជ័យដែលជាតំបន់ការពារអភិរក្សដ៍តឹងរ៉ឹង។
ប្រភពព័ត៌មានបន្តទៀតថានៅតាមដងផ្លូវឃើញមានសមត្ថកិច្ចជាច្រើនស្ថាប័នប្រចាំតាមទីស្នាក់ការរាយគ្នាបណ្តាក់ដូចខ្យងប៉ុន្ដែបានត្រូវរ៉ូវគ្នាជាមួយក្រុមឈ្មួញឈើទៅវិញព្រោះតែបានទទួលផលប្រយោជន៍លាភសក្ការះជាថ្នូរមិនចាប់បង្ក្រាប។បើទោះបីក្រុមឈ្មួញឈើរត់ការបង់លុយក្បាលរថយន្ដអោយគ្រប់ស្ថាប័នសមត្ថកិច្ចច្រើនក៍ដោយក៍ឈ្មួញនៅតែអាចមានលទ្ធភាពរកស៊ីដឹកឈើខុសច្បាប់យ៉ាងកាក់កបរហូតឈានដល់ពង្រីកមុខរបរនេះថែមទៀតគឺបានដើមទុនទិញរថយន្ដសាំយ៉ុង២ទៅ៣គ្រឿងក្នុងឈ្មួញម្នាក់ដើម្បីដឹកឈើ។
ប្រភពព័ត៌មានពីសមត្ថកិច្ចដែលស្និតជាមួយអ្នកសារព័ត៌មានបានអោយដឹងថាឈ្មួញឈើដុះស្លែប្រចាំតំបន់ស្រយង់រួមមានទី១ឈ្មោះយាយលីជាឈ្មួញឈើជើងខ្លាំងខាងចេញក្បាច់គុណវាយតប់អ្នកកាសែតនិងសមត្ថកិច្ច,វ៉ា,ហាក់,ណាក់,តាំងគានិងយាយបារាំងប្រពន្ធតាគិត,យាយអេងឈ្មួញឈើធំប្រចាំទីរួមស្រុកគូលែន។ក្រុមឈ្មួញប្រុសស្រីរកស៊ីដឹកឈើគេចពន្ធទាំង៨នាក់នេះបានធ្វើអធិរាជដឹកឈើដឹកឈើប្រណីតនិងឈើជ្រាយយកទៅលក់នៅខេត្តសៀមរាបបានចំណូលយ៉ាងកាក់កបនិងយ៉ាងរលូនជិត២០ឆ្នាំមកហើយ។
ជំនាញមេព្រៃប្រចាំសង្កាត់រដ្ឋបាលព្រៃឈើគូលែនបានប្រាប់អ្នកសារព័ត៌មានថាសព្វថ្ងៃនេះមិនឃើញមានក្រុមឈ្មួញឈើដឹកឆ្លងកាត់តំបន់គាត់គ្រប់គ្រងទ្បើយ។
រីឯឈ្មួញឈើខ្លះក្នុងចំណោមឈ្មួញឈើទាំង៧នាក់ខាងលើបាននិយាយបោះពាក្យសំដីថាពួកគាត់បង់លុយក្នុង១ក្បាលរថយន្ដចំនួន១០ម៉ឺនរៀលទៅអោយគ្រប់ជំនាញមេព្រៃនៅតាមទីស្នាក់ការជាប់ដងផ្លូវជាតិនិងបង់ចំនួន៤ម៉ឺនរៀលផ្សេងទៀតទៅអោយគ្រប់ស្ថាប័នសមត្ថកិច្ចចម្រុះរាប់សិបកន្លែងឈរជើងនៅតាមដងផ្លូវទើបពួកគាត់អាចដឹកឈើខុសច្បាប់យកទៅលក់អោយឈ្មួញកណ្តាលដល់គោលដៅ៕
