Post News Media ព័ត៌មានបច្ចេកវិទ្យា iPhone 8 អាចន...

iPhone 8 អាចនឹងឡើងថ្លៃដល់ជាងមួយខ្ទាស់ ដោយសារប្រើអេក្រង់ OLED

យោងតាមរបាយការណ៍ពីគេហទំព័រ Fast Company បានឱ្យដឹងថា តម្លៃទូរសព្ទដៃ iPhone ស៊េរីឆ្នាំ ២០១៧ របស់ក្រុមហ៊ុន Apple អាចកើនដល់ជាង ១,០០០ ដុល្លារ ដោយសារតែកញ្ចក់អេក្រង់របស់វាត្រូវបានផ្លាស់ប្តូរពីប្រភេទ LCD ទៅ OLED និងបំពាក់អង្គចងចាំកាន់តែធំ ដែលទាមទារការចំណាយថ្លៃដើមក្នុងការផលិតកាន់តែខ្ពស់។

ប្រភពព័ត៌មានដដែលបានលើកឡើងបន្ថែមថា ក្រៅពីបំពាក់អេក្រង់ថ្មី និងមាន Memory កាន់តែធំ វាក៏នឹងបំពាក់សម្បកផលិតពីកញ្ជក់នៅផ្នែកខាងខ្នង និងប្រើគែមលោហ:មិនចេះឆ្កូត ជំនួសយគែមអាលុយមីញ៉ូម។

iPhone 8 ត្រូវបានលេចឮព័ត៌មានជាហូរហែមកថា វានឹងផលិតចេញពីរម៉ូឌែល មានទំហំអេក្រង់ប៉ុន iPhone 7 (៤.៧ អ៊ីញ) និង iPhone 7 Plus (៥.៥ អ៊ីញ) ហើយមានឈ្មោះថា iPhone 7s និង iPhone 7s Plus មិនមែន iPhone 8 ដូចព័ត៌មានចចាមអារ៉ាមខ្លះបានចុះផ្សាយនោះទេ។

អ្នកវិភាគដ៏ប្រាកដប្រជាមួយរូបមកពីក្រុមហ៊ុន KGI Securities គឺលោក Ming-Chi Quo បានអះអាងកាលពីចុងឆ្នាំមុនថា iPhone ស៊េរីថ្មីរបស់ក្រុមហ៊ុនយក្សអាមេរិក នឹងបំពាក់អេក្រង់ប្រភេទ OLED តែមួយម៉ូឌែលប៉ុណ្ណោះ។

គួរបញ្ជាក់ថា ក្រុមហ៊ុន Apple ត្រូវបានគេរំពឹងថា នឹងមិនផ្លាស់ប្តូរទម្លាប់ក្នុងការប្រកាសចេញ iPhone ជំនាន់ថ្មី មុខ ឬក្រោយខែ កញ្ញា នោះទេ ដូច្នេះ គ្រប់យ៉ាងអាចនឹងប្រែប្រួល។ ប៉ុន្តែ ប្រសិនបើ iPhone ស៊េរីបន្ទាប់នោះពិតជាបំពាក់អេក្រង់ OLED មែននោះ លោកអ្នកដែលកំពុងទន្ទឹងរងចាំចង់បានវាមកប្រើ សូមត្រៀមលុយទុកជាងមួយខ្ទាស់ឱ្យហើយទៅ៕

ប្រភពព័ត៌មាន: techcrunch