Safari គឺជាកម្មវិធីរុករកលើបណ្តាញអ៊ិនធើណែត សម្រិតសម្រាំងឡើងដោយក្រុមហ៊ុនបច្ចេកវិជ្ជាយក្ស Apple ដាក់ឲ្យប្រើប្រាស់ប្រចាំនៅលើប្រព័ន្ធ iOS តាំងពីជំនាន់ដំបូងមកម្ល៉េះ។

អ្នកដែលកំពុងប្រើប្រាស់​ផលិតផល iPhone/iPad ប្រហែលជាធ្លាប់បានប្រើកម្មវិធីនេះហើយ។ តែអ្វីដែលពិសេស ប្រិយមិត្តត្រូវយល់ដឹងបន្ថែម អំពីការប្រើប្រាស់កម្មវិធីមួយនេះឲ្យមានសុវត្ថិភាពខ្ពស់ ប្រើរហ័សជាងមុន ងាយគ្រប់គ្រងការរុករក និងទាញយកផលប្រយោជន៍ជាច្រើនពីវា។

ឥឡូវនេះក្រុមការងារ Post Tech សូមលើកយកគន្លឹះពិសេស ១០​ យ៉ាងមកបង្ហាញជូនប្រិយមិត្តឲ្យបានដឹង​ និងងាយយល់ច្បាស់៖

១ – អក្សរកាត់នៃអាសយដ្ឋានគេហទំព័រ (Web Address Shortcut)

ខណ:ពេលកំពុងវាយបញ្ចូលអាសយដ្ឋានគេហទំព័រណាមួយនៅលើកម្មវិធី អ្នកអាចចុចឲ្យជាប់ត្រង់ប៊ូតុង “.” លើក្តារចុច ដើម្បីទទួលបានអក្សរកាត់នៃគេហទំព័រណាមួយ។ ជម្រើសរបស់អ្នកអាចជា .com, .net, .edu, .org ឬ .us ។

២ – ចម្លងដាក់ និងស្វែងរក (Paste and Go)

បើសិនជាអ្នកបានចម្លងពាក្យ ឬតំណភ្ជាប់ពីកម្មវិធីណាមួយរួច ហើយចង់យកវាទៅទម្លាក់ដាក់ក្នុងកម្មវិធី Safari ដើម្បីស្វែងរក លោកអ្នកគ្រាន់តែចុចឲ្យជាប់ត្រង់របារុករកនៃកម្មវិធី រួចជ្រើសរើសយកពាក្យថា Paste and Go។ នេះបានសេចក្តីថា អ្នកទម្លាក់អ្វីដែលបានចម្លងទុកដាក់ចូល រួចធ្វើការស្វែងរកដោយស្វ័យប្រវត្តិ។

៣ – ចូលទៅកាន់ទម្រង់ប្រើប្រាស់ឯកជន (Enter Private Browsing mode)

Private Browsing Mode គឺជាទម្រង់ប្រើប្រាស់លក្ខណ:ឯកជន អនុញ្ញាតឲ្យអ្នកបើកវេបសាយ ដោយមិនបន្សល់ទុកដានលើទូរស័ព្ទអ្នកឡើយ។ រាល់គេហទំព័រដែលលោកអ្នកបានបើក កម្មវិធីនឹងមិនធ្វើការចំណាំអ្វីទាំងអស់ក្រោយពេលចាកចេញ។ ដើម្បីចូលក្នុងទម្រង់ប្រើប្រាស់ឯកជនបាន សូមចុចលើមឺនុយ​ រូបប្រអប់ជ្រុង រួចចុចលើប៊ូតុង Private។

៤ – ស្នើការបង្ហាញជាលក្ខណ:កុំព្យូទ័រ (Request Desktop Site)

ចុចឲ្យជាប់ត្រង់និម្មិតសញ្ញា​ Refresh (បើកសារជាថ្មី) រួចចុចលើប៊ូតុង​​ Request Desktop Site ដើម្បីស្នើសុំការបង្ហាញជាលក្ខណ:កុំព្យូទ័រ ជំនួសពីការបង្ហាញលក្ខណ:ទូរស័ព្ទដៃ។ នេះមិនមែនមានន័យថារាល់ការស្នើសុំគឺត្រូវតែចេញនោះទេ គឺវាអាស្រ័យលើវេបសាយនោះដែរ។

៥ – ទាញយកគេហទំព័រដាក់លើផ្ទាំងកម្មវិធី(Add Website to Home Screen)

ការធ្វើបែបនេះ គឺជាវិធីបញ្ឆោតយកវេបសាយណាមួយ មកតាំងធ្វើដូចជាកម្មវិធីមួយអីចឹងដែរ និងដើម្បីងាយបើកមើលពេលក្រោយ។ ដំបូងសូមចុចលើមឺនុយ Share មានរូបតាង ប្រអប់ជ្រុងនិងព្រួញបាញ់ឡើងលើ បន្ទាប់មកចុចលើប៊ូតុង Add to Home Screen បន្ទាប់់មកទៀត ផ្តល់ឈ្មោះណាមួយសម្រាប់វេបសាយដែលកំពុងទាញទុក។

៦ – វិធីដាក់ Bookmark ឬ Reading List ផ្លូវកាត់ (Quickly add Bookmark or Reading List Item)

ចុចឲ្យជាប់ត្រង់មឺនុយ រូបសៀវភៅ រួចជ្រើសរើសយកពាក្យ Add Bookmark ឬ Add to Reading List ជាការរក្សាទុកគេហទំព័រណាមួយជាចាំបាច់។

៧ – បើកមើល និងរៀបចំ Reading List (Access and Organize Reading List)

Reading List គឺដាច់ដោយឡែកពី Bookmark និងមានន័យថា ជាការរក្សាទុកតំណភ្ជាប់វេបសាយណាមួយងាយយកមកអានពេលក្រោយ។ ដើម្បីបើករកមើលវាបាន សូមចុចលើមឺនុយ រូបសៀវភៅ បន្ទាប់មកចុចលើប៊ូតុង រូបវែនតា អ្នកច្បាស់ជាឃើញតំណភ្ជាប់វែបសាយដែលបានរក្សាទុក បន្ទាប់មកទៀត សូមអូសមកឆ្វេងលើតំណភ្ជាប់ណាមួយ និងជ្រើសរើសយកពាក្យថា ​Mark Read ក្រោយពេលបានអាចវារួចហើយ ឬក៏ជ្រើសរើសយកពាក្យថា Delete ដើម្បីលុបចោលតែម្តង។

៨ – បិទវែបសាយណាមួយយ៉ាងរហ័ស (Quickly Close Tabs)

ត្រង់មឺនុយ រូបប្រអប់ជ្រុង ជាកន្លែងបង្ហាញវេបសាយជាច្រើនដែលអ្នកធ្លាប់បើកចូលមើល ហើយអ្នកអាចបិទវេបសាយនីមួយៗចោល ដោយអូសលើវេបសាយណាមួយមកឆ្វេង ជាការប្រសើរជាងចុចបិទលើប៊ូតុង X ។

៩ – បិទវែបសាយទាំងអស់ក្នុងពេលតែមួយ(Close All Your Tabs)

ប្រសិនបើអ្នកចង់បិទវេបសាយទាំងអស់ក្នុងពេលតែមួយ សូមចុចឲ្យជាប់ត្រង់មឺនុយ រូបប្រអប់ជ្រុង រួចជ្រើសរើសពាក្យ Close All Tabs ដែលជាធម្មតាវាបង្ហាញជាលេខចំនួនវេបសាយដែលបានបើក។ ឧទាហរណ៍ Close 2 Tabs ឬ Close 3 Tabs។

១០ – វិធីត្រលប់គេហទំព័រទៅមុខ ឬមកក្រោយយ៉ាងរហ័ស(Quickly navigate back or forward)

វិធីដ៏លឿនបំផុតក្នុងការត្រឡប់គេហទំព័រទៅមុខ ឬមកក្រោយ គឺគ្រាន់តែចុចអូសពីគែមខាងឆ្វេងនៃអេក្រង់ទៅស្តាំ ឬពីគែមខាងស្តាំនៃអេក្រង់ទៅឆ្វេង។ ការអូសពីខាងឆ្វេងទៅស្តាំ មានន័យថាត្រឡប់គេហទំព័រមកក្រោយ និងការអូសពីខាងស្តាំទៅឆ្វេង មានន័យថា ត្រឡប់គេហទំព័រទៅមុខវិញ។