Google Play Store គឺជាឃ្លាំងកម្មវិធី-ហ្គេមសម្រាប់ទូរសព្ទដៃស្មាតហ្វូន និងឧបករណ៍ថេប្លេតដើរដោយប្រព័ន្ធ Android។ កម្មវិធីនេះ ជាទូទៅគឺវាឧស្សាហ៍ជួបបញ្ហាជាប់គាំងណាស់។ ដូច្នេះ ចុះបើវាកើតចំទូរសព្ទរបស់លោកអ្នក តើដឹងត្រូវធ្វើម៉េចអត់ ដើម្បីកែឱ្យវាដូចដើរស្រួលវិញ? មិនថ្វីទេ គន្លឹះ ៣ យ៉ាងខាងក្រោមនេះ នឹងជួយដោះស្រាយបញ្ហានេះបានដូចគេប៉ះ។

១– ឆែកមើលការកំណត់ពេលវេលាលើទូរសព្ទ

សូមឆែកមើលថាតើទូរសព្ទលោកអ្នកកំណត់ម៉ោងពេលត្រឹមត្រូវហើយឬនៅ។ ព្រោះបើកម្មវិធី Play Store មិនអាចស្វែងរកពេលវេលាពិតប្រាកដលើទូរសព្ទរបស់លោកអ្នកទេនោះ វានឹងជាប់គាំង មិនអនុញ្ញាតឱ្យលោកអ្នកទាញយកកម្មវិធី-ហ្គេមទៅប្រើប្រាស់បានឡើយ។ ដូច្នេះ សូមចូលទៅកាន់កម្មវិធី Settings -> Advanced settings -> Date & time រួចចុចបិទមុខងារ Automatic date & time (ប្រសិនបើវាបើក) រួចចូលទៅកែម៉ោងពេល​ឱ្យបានត្រឹមត្រូវឡើងវិញ (ប្រសិនបើវាខុស) ជាការស្រេច។

២– លុបគណនី Google ចោល រួចបញ្ចូលឡើងវិញ

នេះគឺជាដំណោះស្រាយគួរអនុវត្តដោយប្រយត្នប្រយែង។ ព្រោះថា ពេលគណនី Google ត្រូវបានលុប វាមិនមែនលុបចេញតែនៅលើ Play Store នោះទេ គឺក៏នៅលើកម្មវិធីផ្សេងៗទៀតក្នុងទូរសព្ទ Android របស់លោកអ្នកដែរ។ ដូច្នេះ សូមប្រាកដថា លោកអ្នកស្គាល់គណនីដែលខ្លួនបម្រុងនឹងលុប។​ ដើម្បីធ្វើបែបនេះ សូមចូលទៅកាន់កម្មវិធី Settings -> Accounts -> Google Account រួចចុចលើមឺនុយរូបសញ្ញាចុចបី ហើយចុចលើ Remove account។ បន្ទាប់មក នៅលើ Google Account ដដែល សូមចុចលើ Add Account រួចវាយបញ្ចូលឈ្មោះ និងលេខសម្ងាត់គណនី Google ផ្ទាល់ខ្លួនណាមួយរបស់លោកអ្នក ជាការស្រេច។

៣– សម្អាតទិន្នន័យចាស់ៗក្នុង Google Play Services

បញ្ហាជាប់គាំងរបស់ Google Play Store ជួនកាលបណ្តាលមកពីសំណល់ឯកសារកើតចេញពីការប្រើប្រាស់សេវាកម្មផ្សេងៗរបស់ Google ដែលមាននៅលើទូរសព្ទ Android របស់លោកអ្នក។ ដូច្នេះ បើវិធីទាំងពីរខាងលើនៅពុំអាចជួយឱ្យ Play Store ដំណើរការឡើងវិញទេនោះ សូមចូលទៅសម្អាតឯកសារទាំងនោះ តាមកម្មវិធី Settings -> Application Manager ឬ Apps រួចស្វែងរកឈ្មោះកម្មវិធី Google Play Services បន្ទាប់មក ចុចលើប៊ូតុង Clear data និង Clear cache ជាការស្រេច។

បញ្ជាក់: ទូរសព្ទដើរដោយប្រព័ន្ធ Android ជារួមគឺវាអាចមានផ្ទាំងកម្មវិធីប្រើប្រាស់ខុសគ្នាទៅតាមជំនាន់របស់វា និងម៉ាកទូរសព្ទផ្សេងៗគ្នា។ ដូច្នេះ ការណែនាំឱ្យចូលតាមដំណាក់កាលនីមួយៗ និងការប្រើឈ្មោះខាងលើ អាចនឹងខុសគ្នាជាមួយទូរសព្ទរបស់លោកអ្នក។ ដូច្នេះ សូមលោកអ្នកព្យាយាមរកពាក្យ ឈ្មោះប៊ូតុង ឬមឺនុយដែលស្រដៀងទៅនឹងអ្វីដែល Post Tech បានបង្ហាញទៅតាមការគួរ៕