ក្រោយពីបានឆ្លងកាត់វិបត្តិដ៏ធ្ងន់ធ្ងរកើតចេញពីការផ្ទុះឆេះទូរសព្ទដៃកំពូល Galaxy Note 7 ជាច្រើនករណី ដែលនាំឱ្យខ្លួនបង្ខំចិត្តបញ្ចប់ជីវិតរបស់វារួចមក ក្រុមហ៊ុន Samsung ត្រូវគេមើលឃើញថា មិនត្រឹមតែមិនបោះបង់សែស្រឡាយស្មាតហ្វូនប្រភេទអេក្រង់ធំរបស់ខ្លួននេះប៉ុណ្ណោះទេ ប៉ុន្តែ ថែមទាំងអភិវឌ្ឍវាឱ្យកាន់តែប្រណិត ទំនើប និងខ្លាំងថែមទៀតផង។ នេះបើសិនព័ត៌មានបែកធ្លាយជាបន្តបន្ទាប់កន្លងមកគឺជាការពិតនោះ។

នៅលើទំព័រ Twitter ផ្លូវការមួយរបស់ក្រុមហ៊ុន​ Samsung ដែលមានគណនីឈ្មោះ SamsungExynos បានបង្ហោះបង្អួតបន្ទះឈីបជំនាន់ថ្មីរបស់ខ្លួន Exynos9 ជាមួយស្មាតហ្វូនមិនស្គាល់លេខម៉ូឌែលមួយដែលមើលទៅដូចបេះបិទទៅនឹងរូបរាង Galaxy Note 8 ដែលត្រូវបានទម្លាយឱ្យឃើញកន្លងមក។ តាមលក្ខណៈរូបរាង Note 8 នោះ គឺវាស្រដៀងខ្លាំងទៅនឹង Galaxy S8 និង S8+ ដោយមើលទៅគ្រាន់តែមានទំហំអេក្រង់ធំជាងបន្តិច និងកោងត្រង់គែមសងខាង ហើយស្ទើរគ្មានស៊ុម។

យោងតាមព័ត៌មានក្រៅផ្លូវការអះអាងចេញពីប្រភពស្និទ្ធនឹងក្រុមហ៊ុនផ្ទាល់បានឱ្យដឹងថា Samsung កំពុងត្រៀមអាវុធថ្មីមួយនេះ បន្ថែមពី Galaxy S8 និង S8+ ដើម្បីតទល់ជាមួយ iPhone 8 របស់ Apple ដែលល្បីថានឹងពាំនាំមកជាមួយបច្ចេកវិទ្យា​ និងរចនាបទដ៏គួរឱ្យភ្ញាក់ផ្អើល សម្រាប់អំណរខួប ១០​ ឆ្នាំរបស់វា។

ប្រភពដដែលបន្ថែមថា ក្រុមហ៊ុនអេឡិចត្រូនិកយក្សកូរ៉េខាងត្បូង នឹងបើកបង្ហាញអាវុធថ្មីនោះជាផ្លូវការ ឱ្យបានមុនការបើកបង្ហាញទូរសព្ទ iPhone ស៊េរីឆ្នាំ ២០១៧ នៅខែក្រោយ ក្នុងព្រឹត្តិការណ៍មួយ នាទីក្រុងញូវយ៉ក សហរដ្ឋអាមេរិក។

គួររំឭកថា យោងតាមព័ត៌មានក្រៅផ្លូវការ Samsung Galaxy Note 8 នឹងបំពាក់អេក្រង់ដែលខ្លួន​ឱ្យឈ្មោះ​ថា Infinity Display មានខ្នាត Quad HD អាចបញ្ចាំងរូបភាពកម្រិត 4K ប្រើបន្ទះឈីប Snapdragon 835 អមដោយ RAM ទំហំ ៦ GB ភ្ជាប់មកជាមួយបច្ចេកវិទ្យាសាកថ្មឥតខ្សែ ការពារជម្រាបទឹក និងអាចបន្ថែមអង្គផ្ទុកទិន្នន័យបាន។ ម្យ៉ាងទៀត វានឹងភ្ជាប់មកជាមួយប៊ិក S Pen ថ្មី ព្រមជាមួយជំនួយការសំឡេង​ឌីជីថល Bixby មកស្រាប់ផងដែរ៕

ប្រភពព័ត៌មានៈ cultofmac