ក្រោយពីបានបិទបញ្ចប់កិច្ចព្រមព្រៀងទិញ-លក់ជាមួយក្រុមហ៊ុនផលិតបន្ទះឈីបបំពាក់លើរថយន្តស្វ័យបើកបរ Mobileye រួច ក្រុមហ៊ុនផលិតបន្ទះឈីព Intel បានប្រកាសថា ខ្លួននឹងស្ថាបនាកងរថយន្តស្វ័យបើកបរគ្មានមនុស្សបើកទាំង​ស្រុង​ចំនួន ១០០ គ្រឿង សម្រាប់ដាក់សាកល្បងនៅក្នុងទឹកដីសហរដ្ឋអាមេរិក អ៉ីស្រាអ៊ែល និងអឺរ៉ុប។

ក្បួនរថយន្តស្វ័យប្រវត្តិដំបូងនេះ នឹងចុះលើដងផ្លូវនៅមុនបំណាច់ឆ្នាំនេះ ហើយក្រុមហ៊ុននឹងបង្កើនចំនួនរបស់វាឱ្យបានច្រើនជាង ១០០ គ្រឿង នៅពេលក្រោយៗទៀត។

រថយន្តទាំងនោះនឹងបំពាក់ប្រព័ន្ធស្វ័យប្រវត្តិកម្ម ៤ កម្រិត ដែលនេះមានន័យថា ពួកវានឹងមានសមត្ថភាពអាច​គ្រប់​គ្រងការបើកបរស្ទើរតែគ្រប់ស្ថានភាពដោយខ្លួនរបស់វា ខណៈកម្រិតទី​ ៥ អាចគ្របដណ្តប់យ៉ាងទូលំទូលាយលើការបញ្ជាយានយន្តគ្រប់កាលៈទេសៈ។

គួររំឭកថា ក្រុមហ៊ុនផលិតបន្ទះឈីពយក្សអាមេរិក កាលពីខែមិនា បានប្រកាសពីការទិញយកក្រុមហ៊ុន Mobileye មានមូលដ្ឋាននៅប្រទេសអ៉ីស្រាអ៊ែល ក្នុងទំហំទឹកប្រាក់ ១៥ ពាន់លានដុល្លារ ហើយកិច្ចព្រមព្រៀងទិញ-លក់រវាងក្រុមហ៊ុនទាំងពីរ បានបិទបញ្ចប់ជាស្ថាពរនៅថ្ងៃព្រហស្បត្តិ៍ មិ្សលមិញ ដែលវានឹងជំរុញឱ្យ Intel អាចចាប់ផ្តើមប្រឡូកខ្លួនបានយ៉ាងសកម្មក្នុងទីផ្សារដែលខ្លួនបានប៉ាន់ប្រមាណថានឹងមានតម្លៃជាង ៧ ពាន់ពាន់លានដុល្លារ នៅឆ្នាំ ២០៥០។

គួរបញ្ជាក់ថា ក្រៅពីទិញយកបច្ចេកវិទ្យារបស់ Mobileye ក្រុមហ៊ុន Intel ក៏បានចាប់ដៃគូសហការជាមួយក្រុមហ៊ុនផលិតរថយន្ត BMW និងក្រុមហ៊ុនផ្គត់ផ្គង់បរិក្ខារអេឡិចត្រូនិក និងកម្មវិធីទំនើបដ៏ធំមួយឈ្មោះ Delphi ផងដែរ៕

ប្រភពព័ត៌មានៈ theverge