មុខងារដ៏សំខាន់ផ្តាច់មុខមួយរបស់ក្រុមហ៊ុន Samsung គឺ Bixby Voice Assistant ដែលបានដាក់ឱ្យប្រើប្រាស់លើកដំបូងនៅក្នុងប្រទេសកូរ៉េខាងត្បូង តាមរយៈស្មាតហ្វូន Galaxy S8 និង S8+ នោះ ត្រូវគេរំពឹងថា ក្រុមហ៊ុនកំពុងត្រៀមបើកឱ្យទាញយកទូទាំងសកល នាពេលឆាប់ៗខាមុខនេះហើយ។

ជំនួយការសំឡេងឌីជីថល ដែល Samsung តែងតែរំលើកពីសមត្ថភាពដ៏វាងវៃរបស់វានោះ រហូតមកទល់បច្ចុប្បន្ន ក្រៅពីនៅប្រទេសកំណើតរបស់វា គឺមានតែអ្នកនៅសហរដ្ឋអាមេរិកប៉ុណ្ណោះ ដែលអាចប្រើវាបាន ហើយបានតែភាសាអង់គ្លេសមួយគត់ និងបន្ទាប់ពីពួកគេរងចាំអស់ពេលប្រមាណជាពីរខែ។

យ៉ាងណាក៏ដោយ និងបើទោះជា Samsung មិនបានប្រាប់ថា Bixby Voice នឹងបើកឱ្យប្រើប្រាស់ទូទាំងសក​លពេលណាក្តី ក៏នៅក្នុងការសង្កេតដ៏គួរឱ្យចាប់អារម្មណ៍មួយអាចឱ្យគេសន្និដ្ឋានថា មុខងារដែលគូប្រជែងរបស់ Siri និង Google Now នេះ នឹងត្រូវបានបើកឱ្យទាញយកជាសកលសម្រាប់អ្នកប្រើប្រាស់ទូរសព្ទ Galaxy S8 និង S8+ ឆាប់ៗខាងមុននេះហើយ។

ការហ៊ាននិយាមបែបនេះ គឺដោយគេឃើញ Samsung បានធ្វើបច្ចុប្បន្នភាពកម្មវិធី Contacts ផ្លូវការរបស់ខ្លួននៅថ្ងៃម្សិលមិញ ហើយនៅខាងក្រោមផ្នែក “What’s new” របស់កម្មវិធី គឺមានពាក្យមួយឃ្លាសរសេរថា “Bixby English global launching” ដែលមានន័យ “Bixby ជំនាន់ភាសាអង់គ្លេស នឹងប្រកាសចេញទូទាំងសកលឆាប់ៗខាងមុខ”។

ទោះយ៉ាងណា គេពុំមានកាលបរិឆ្ឆេទជាក់លាក់អំពីថ្ងៃប្រកាសចេញរបស់ Bixby នោះទេ។ ដូច្នេះ ប្រិយមិត្តដែលកំពុងប្រើ Galaxy S8 ឬ S8+ មានតែរងចាំមើលជាមួយ Post Tech ទាំងអស់គ្នាប៉ុណ្ណោះ៕

ប្រភពព័ត៌មានៈ sammobile