ក្រោយពីលេចឮព័ត៌មានចចាមអារ៉ាមមួយរយៈចុងក្រោយនេះ នៅទីបំផុតទៅ ការវិលត្រឡប់របស់ទូរសព្ទដៃ Samsung អេក្រង់បត់បានក្លាយជាការពិតហើយ។

ក្រុមហ៊ុនបច្ចេកវិទ្យាយក្សរបស់កូរ៉េខាងត្បូង បានបើកបង្ហាញស្មាតហ្វូនបត់លំដាប់កំពូលចុងក្រោយបង្អស់ Leader 8 របស់ខ្លួនជាផ្លូវការសម្រាប់ទីផ្សារប្រទេសចិន កាលពីថ្ងៃម្សិលមិញ ជាមួយការបំពាក់ប្រព័ន្ធប្រតិបត្តិការ Android និងលក្ខណៈសម្បត្តិគួរឱ្យចាប់អារម្មណ៍ជាច្រើនផ្សេងទៀត។

បន្ទាប់ពីអវត្តមានប្រហែលមួយទសវត្សរ៍មកនេះ ទូរសព្ទប្រភេទបត់របស់ក្រុមហ៊ុន Samsung បានវិលត្រឡប់មកវិញ ជាមួយរចនាបទយ៉ាងល្អប្រណិត បំពាក់អេក្រង់ Full HD Super AMOLED ទំហំ ៤.២ អីុញ ពីរ ដោយមួយនៅខាងក្នុង និងមួយទៀតនៅខាងក្រៅ ដែលអនុញ្ញាតឱ្យអ្នកប្រើប្រាស់ឆែកដំណឹង ឬព័ត៌មានផ្សេងៗបានយ៉ាងរហ័ស។

Samsung Leader 8 ប្រើប្រាស់បន្ទះឈីប Snapdragon 821, RAM ទំហំ ៤ GB និងមេម៉ូរីជាប់ម៉ាស៊ីនទំហំ ៦៤ GB ថ្មថាមពល ២,៣០០ mAh រួមទាំងកាមេរ៉ាមុខ/ក្រោយទំហំ ៥/១២ MB។

ក្រៅពីនេះ Leader 8 ក៏មានដំឡើងរួចជាស្រេចនូវកម្មវិធី Samsung Pay, Secure Folder និង S Voice បន្ថែមពីលើបន្ទះស្កេនក្រយៅដៃនៅខាងក្រោយ និងការគាំទ្រជាមួយបច្ចេកវិទ្យាសាកថ្មឥតខ្សែរួចជាស្រេច។

ទោះបីជា ស្មាតហ្វូនលំដាប់កំពូលថ្មីនេះ ត្រូវបានប្រកាសចេញសម្រាប់ទីផ្សារប្រទេសចិន ជាមួយជម្រើសពណ៌ខ្មៅតែមួយគត់ក៏ដោយ ក៏គេរំពឹងថា វានឹងបន្តចែកចាយនៅកាន់ទីផ្សារនៃប្រទេសកូរ៉េខាងត្បូង និងប្រទេសអាស៊ីមួយចំនួនផ្សេងទៀត នាពេលឆាប់ៗខាងមុខ។

ដោយឡែក សម្រាប់តម្លៃ និងការបរិច្ឆេទពិតប្រាកដសម្រាប់ការចែកចាយនៅលើទីផ្សារវិញ គឺមិនទាន់ត្រូវបានប្រកាសឱ្យដឹងនៅឡើយ។ តែបើយោងតាមលក្ខណៈសម្បត្តិរបស់វា Samsung Leader 8 គឺទំនងជាមិនមែនមានទាបខ្ពស់៕

ប្រភពព័ត៌មានៈ msn, androidauthority