ខណៈក្រុមហ៊ុន Apple ពង្រីកសែស្រឡាយគ្រួសារ​ iPhone ចំនួន ៣ ម៉ូឌែលបន្ថែម​ទៀតនៅយប់មិញ កម្មវិធីកំណែចុងក្រោយរបស់ iTunes ទាំងសម្រាប់ប្រព័ន្ធ Windows និង Mac ត្រូវបានដកចេញនូវឃ្លាំងកម្មវិធិ iOS ចោលទាំងស្រុង ព្រមទាំងមានការរុះរើមាតិកាថ្មីមួយចំនួនទៀតផង។

ប្រសិនបើប្រិយមិត្តធ្វើបច្ចុប្បន្នភាពកម្មវិធីនេះឱ្យឡើងដល់ជំនាន់ 12.7 នោះនឹងលែងអាចចូលទៅកាន់ឃ្លាំងកម្មវិធី-ហ្គេមសម្រាប់ iOS Devices របស់ខ្លួនតទៅ​ទៀតហើយ។ មូលហេតុដែល Apple សម្រេចដកផ្នែកដ៏សំខាន់នេះចេញ គឺដោយ​សារតែក្រុមហ៊ុនចង់ឱ្យអ្នកប្រើប្រាស់ផ្តោតការយកចិត្តទុកដាក់ទៅលើផលិតផលសំខាន់ៗរបស់ខ្លួនដូចជា Music, Movie, TV Shows, Podcasts និង Audiobooks។ ការផ្លាស់ប្តូរនេះដែរ គឺនាំឱ្យគ្រប់គ្នាត្រូវតែប្រើប្រាស់ iPhone, iPad, ឬ iPod Touch ដើម្បីទាញយកកម្មវិធី-ហ្គេមដែលចង់បានតាមតែលើឧបករណ៍របស់ខ្លួនមួយមុខគត់។

ចំពោះ iTunes កំណែចុងក្រោយនេះ ក្រុមហ៊ុនអាមេរិកបានបន្ថែមសមត្ថភាពផ្ទេរ Social Music ជាមួយឧបករណ៍ដែលដំណើរការលើ iOS 11 សម្រាប់អ្នកដែលបានជាវសេវាកម្ម Apple Music។

ការផ្លាស់ប្តូរដទៃផ្សេងទៀត គឺមានដូចជា ការចលតមាតិកា iTunes U ទៅកាន់ផ្នែក Podcast ការទាញយកសំឡេងរោទិ៍ឡើងវិញអាចធ្វើឡើងតាម iPhone ឬ iPad ដើរលើ iOS 11 ផ្ទាល់ ហើយផ្នែក Internet Radio បានរុញទៅចូលក្នុង Music Library (បណ្តាល័យតន្រ្តី) ជាដើម។

ក្រុមហ៊ុន Apple បាននិយាយថា ប្រសិនបើអ្នកប្រើប្រាស់ iPhone ណាចង់ Restore បទចម្រៀង ឬកម្មវិធីដែលលែងមានតទៅទៀត ក៏នៅតែអាចធ្វើបានដដែលតាមកម្មវិធី iTunes ដោយភ្ជាប់ទូរសព្ទរបស់ខ្លួនទៅកាន់ PC (កុំព្យូ​ទ័រ​លើតុ ឬយួរដៃ) តាមខ្សែ USB៕

ប្រភពព័ត៌មានៈ engadget