ក្រុមហ៊ុន Apple បានចេញមុខទទួលស្គាល់ថា ពិតជាមានករណីសិស្សធ្វើការលើសម៉ោងកំណត់ដោយច្បាប់ការងារនៅឯរោងចក្រ Foxconn ដើម្បីផលិតចេញ iPhone X មែន។ នេះបើយោងតាមប្រភពព័ត៌មានពីគេហទំព័រ CultoMac ចុះផ្សាយនៅថ្ងៃអង្គារ៍ម្សិលមិញ។

គេហទំព័រដដែលបានរាយការណ៍ដោយស្រង់ប្រភពពីកាសែត Financial Times បន្ថែមថា មានសិស្សវិទ្យាល័យចំនួន ៦ នាក់ អាយុចន្លោះពី ១៧ ទៅ ១៩ ឆ្នាំ កំពុងធ្វើការ ១១ ម៉ោងក្នុងមួយថ្ងៃ ដើម្បីដំឡើង iPhone X នៅឯរោងចក្រ Foxconn មួយ នាទីក្រុង Zhengzhou ប្រទេសចិន។

សិស្សម្នាក់ក្នុងចំណោមពួកគេទាំង ៦ បាននិយាយថា «យើងកំពុងត្រូវបានបង្ខំដោយសាលារបស់យើងឱ្យមកធ្វើការនៅទីនេះ»។ សិស្សស្រីម្នាក់នោះបានបន្ថែមថា អំឡុងពេលធ្វើការនៅ Foxconn នាងដំឡើងកាមេរ៉ា iPhone X ចំនួន ១,២០០ គ្រឿងក្នុងមួយថ្ងៃ។

ក្រុមហ៊ុន Foxconn សារភាពថា សិស្សទាំងនោះពិតជាធ្វើការថែមម៉ោងលើសពី ៤០ ម៉ោងក្នុងមួយសប្តាហ៍ ខុសពីគោលការក្រុមហ៊ុនមែន ខណៈពួកគេទំនេរពីការសិក្សា និងត្រូវបានផ្តល់ប្រាក់ឈ្នួលសម្រាប់ការងាររបស់ពួកគេក្នុងនាមជាអ្នកស្ម័គ្រ​ចិត្ត។

ទាក់ទងទៅនឹងបញ្ហានេះ ក្រុមហ៊ុន Apple បានបើកការស៊ើបអង្កេតដោយផ្ទាល់ និងបានរកឃើញថា មានករណីសិស្សហាត់ការកំពុងធ្វើការថែមម៉ោងខុសច្បាប់នៅរោងចក្រអ្នកផ្គត់ផ្គង់ iPhone របស់ខ្លួនមួយ ក្នុងប្រទេសចិន។

គួរបញ្ជាក់ថា នៅអំឡុងពេលដ៏មមាញឹករៀងរាល់ឆ្នាំដែល iPhone ស៊េរីថ្មីចេញ Foxconn ត្រូវគេរាយការណ៍ថា អាចជួលមនុស្ស ៣០០,០០០ នាក់ ឱ្យធ្វើការដំឡើង iPhone ឱ្យបានចំនួនកំណត់ ២០,០០០ គ្រឿងក្នុងមួយថ្ងៃ។

គួររំឭកថា ក្នុងរយៈពេលពីរបីឆ្នាំកន្លងទៅនេះ ចង្វាក់ផលិតកម្មទូរសព្ទ iPhone របស់ក្រុមហ៊ុន​ Apple នៅក្នុងប្រទេសចិន បានរងការរិះគន់ថាមានការរំលោភបំពានច្បាប់ការងារ ដោយការបង្ខំកម្មករនិយោជិកឱ្យធ្វើការលើសម៉ោងកំណត់ និងជួលមនុស្សក្រោមអាយុឱ្យចូលធ្វើការជាដើម។ ឆ្លើយតបទៅនឹងបញ្ហានេះ Apple ក៏បានបើកការស៊ើបអង្កេត និងចាត់វិធានការដោះស្រាយបានជាបន្តបន្ទាប់​រហូតដល់ ៩៥% ផងដែរ៕

ប្រភពព័ត៌មានៈ cultomac