ដូចតាមការសន្យា ក្រុមហ៊ុន Apple នៅថ្ងៃនេះ បានប្រកាសបើកឱ្យអតិថិជន iPhone ចាប់ពីម៉ូឌែល 6 ឡើង អាចមកប្តូរថ្មថ្មីសម្រាប់ទូរសព្ទរបស់ខ្លួនក្នុងតម្លៃត្រឹម ២៩ ដុល្លារ ខណ:តម្លៃធម្មតាគឺមានពី ៥០ ដុល្លារ ទៅ ៧៩ ដុល្លារ។
ការបញ្ចុះតម្លៃថ្មនេះ គឺធ្វើឡើងបន្ទាប់ពីគេរកឃើញថា ក្រុមហ៊ុនបានបន្ថយល្បឿនដំណើរការផលិតផល iPhone របស់ខ្លួនទៅតាមអាយុកាលនៃថ្មរបស់វា ក្រោមហេតុផលដើម្បីបញ្ជៀសបញ្ហាម៉ាស៊ីនរលត់ដោយសារថាមពលថ្មចុះខ្សោយ មិនអាចទ្រទ្រង់តម្រូវការពីអង្គប្រតិបត្តិការទូរសព្ទបានគ្រប់គ្រាន់។
គួរបញ្ជាក់ថា ការបញ្ចុះតម្លៃថ្មនេះដែរ គឺឋិតក្នុងដំណោះស្រាយមួយក្នុងចំណោមដំណោះស្រាយពីរសម្រាប់បញ្ហាខាងលើ ដោយមួយទៀត Apple ថា នឹងដាក់ចេញកម្មវិធីមួយភ្ជាប់ជាមួយកំណែ iOS លើកក្រោយ ដើម្បីអនុញ្ញាតឱ្យអ្នកប្រើប្រាស់ iPhone អាចស្វែងយល់ពីបញ្ហាថ្ម និងសមត្ថភាពរបស់វា ថាតើអាចប៉ះពាល់ដល់ដំណើរការម៉ាស៊ីនទូរសព្ទឬក៏អត់។
សម្រាប់ព័ត៌មានលម្អិតទាក់ទងទៅនឹងការផ្តល់ជូននេះ លោកអ្នកអាចចូលអានបន្ថែមក្នុងគេហទំព័រ Apple។
គួររំឭកថា ថ្មីៗនេះ បន្ទាប់ពី Apple សារភាពថាខ្លួនពិតជាទម្លាក់ល្បឿនដំណើរការ CPU របស់ iPhone ទៅតាមអាយុកាលថ្ម ដោយចេតនា តាមរយ:កំណែ iOS រួចមក ក្រុមហ៊ុនកំពុងរងនូវបណ្តឹងផ្លូវច្បាប់ជាច្រើន បន្ថែមពីលើការរិះគន់យ៉ាងជះដៃពីមជ្ឈដ្ឋានផ្សេងៗ ដោយខ្លះថា ក្រុមហ៊ុនគួរតែផ្តល់សារក្រើនរំឭកដល់អតិថិនជនអំពីបញ្ហាថ្មនោះ ជាជាងការបន្ថយល្បឿនទូរសព្ទដោយសម្ងាត់បែបនេះ៕
មតិយោបល់