ក្រោយពីបែកធ្លាយព័ត៌មានចចាមអារ៉ាមអំពីស្មាតហ្វូន Xperia ចំនួ​ន ៣ ម៉ូឌែល នៅប៉ុន្មានសប្តាហ៍កន្លងទៅនេះ ក្រុមហ៊ុន Sony បានផ្តល់ដំណឹងថា​ ខ្លួននឹងរៀបចំព្រឹត្តិការណ៍ដ៏សំខាន់មួយនៅអំឡុងពិព័រណ៍ផលិតផលអេឡិចត្រូនិកពិភពលោកឆ្នាំ ២០១៨ ហៅកាត់ថា CES 2018 នាថ្ងៃច័ន្ទ ទី ០៨ ខែមករា វេលាម៉ោង ៥ ល្ងាច ត្រូវនឹងម៉ោង ៩ ព្រឹក ថ្ងៃអង្គារ៍ ទី ០៩ ម៉ោងនៅកម្ពុជា។ នេះបើយោងតាមប្រភពពី XperiaBlog ចុះផ្សាយថ្ងៃម្សិលមិញ។

តាមរយៈសារបង្ហោះផ្សាយក្នុងបណ្តាញ Twitter ផ្លូវការរបស់ក្រុមហ៊ុនឈ្មោះ Sony Xperia News បានឱ្យដឹង​ថា ព្រឹត្តិការណ៍នោះនឹងរៀបចំធ្វើឡើងនៅឯទីក្រុង Las Vegas សហរដ្ឋអាមេរិក ហើយក្រុមហ៊ុន Sony Mobile នឹងមានដំណឹង និងព័ត៌មានបច្ចុប្បន្នភាពផ្តាច់មុខសម្រាប់ប្រកាសជូនសាធារណជន។

តាមរយៈព្រឹត្តិការណ៍នោះដែរ គេរំពឹងថាក្រុមហ៊ុនអេឡិចត្រូនិកយក្សរបស់ជប៉ុន នឹងប្រកាសចេញជាផ្លូវការនូវស្មាតហ្វូនលំដាប់ថ្នាក់កណ្តាលថ្មី ២​ ម៉ូឌែល រួមមាន Sony Xperia XA2 Ultra និង Xperia XA2, និងលំដាប់ថ្នាក់ទាបមួយម៉ូឌែលឈ្មោះ Xperia L2 ដែលបានបែកធ្លាយព័ត៌មានថ្មីៗ រួមទាំងផលិតផលថ្មីៗគួរឱ្យចាប់អារម្មណ៍​ដទៃផ្សេងទៀត ដែលនោះអាចជាឧបករណ៍បន្ទាប់បន្សំ និងបំពាក់ជាប់កាយថ្មីៗមួយចំនួនផ្សេងទៀត ដូចជា Sony Smart Wear ជាដើម។

ជាមួយគ្នានោះ បើយោងតាមព័ត៌មានក្រៅផ្លូវការទម្លាយចេញដោយលោក Evan Blass បានឱ្យដឹងថា Xperia XA2 Ultra នឹងបំពាក់កាមេរ៉ាមុខពីរ អមជាមួយពិល Flash ជំនួយពន្លឺមួយ ខុសពី XA2 មានកាមេរ៉ាមុខតែមួយ ហើយម៉ូឌែលទាំងពីរទំនងជាប្រើ Sensor កាមេរ៉ាធំ និងដំណើរការលើប្រព័ន្ធ Android Oero 8 ដូចគ្នា។

ប្រភពដដែលឱ្យដឹងទៀតថា Xperia XA2 Ultra នឹងបំពាក់អេក្រង់ Full HD ទំហំ ៦ អីុញ ប្រើបន្ទះឈីប Snapdragon 630, RAM ទំហំ ៤ ជីហ្គាបៃយ៍ មេម៉ូរីជាប់ម៉ាស៊ីនទំហំ ៦៤ ជីហ្គាបៃយ៍ និងកាមេរ៉ាមុខ/ក្រោយទំហំ ១៥/២៣ មេហ្គាភិចសែល។ សម្រាប់ XA2 គឺនឹងមានអេក្រង់តូចជាង ទំហំ ៥ ឬ ៥.២ អីុញ RAM ទំហំ ៣ ជីហ្គាបៃយ៍ ឯមេម៉ូរីជាប់ម៉ាស៊ីនទំហំ ៣២ ជីហ្គាបៃយ៍ និងកាមេរ៉ាមុខ/ក្រោយទំហំ ៨/២៣ មេហ្គាភិចសែល។

សម្រាប់ Xperia L2 គឺនឹងមានរចនាបទបែប Sony ស្រដៀងទៅនឹង Xperia XA2 Ultra និង XA2 ប៉ុន្តែ វាមានកម្រិតអេក្រង់ត្រឹម HD ទំហំ ៥.២ ឬ ៥.៥ អីុញ ហើយអាចនឹងដំណើរការលើប្រព័ន្ធ Android Nougat 7៕