“អេក្រង់កប់គែមកម្រិត 4K កាមេរ៉ាភ្លោះ និងប្រើបន្ទះឈីប Snapdragon 845”

ប្រសិនបើលោកអ្នកកំពុងរងចាំវត្តមានស្មាតហ្វូនលំដាប់កំពូលរបស់ក្រុមហ៊ុន Sony ប្រកាសចេញនៅក្នុងព្រឹត្តិ ការណ៍ CES 2018 ដែលកំពុងប្រព្រឹត្តិទៅនាទីក្រុង Los Vegas សហរដ្ឋអាមេរិក លោកអ្នកប្រហែលជាត្រូវខកចិត្តហើយ។ ត្រូវខកចិត្តក៏ដោយសារតែ មានរបាយការណ៍ច្បាស់ការថ្មីមួយពីគេហទំព័រ Vortex.ge អះអាងថា ក្រុមហ៊ុនអេឡិចត្រូនិកយក្សរបស់ជប៉ុនមួយនេះ នឹងមិនបើកបង្ហាញស្មាតហ្វូនទំនើបផុតលេខរបស់ខ្លួន ដែលត្រូវគេដឹងថាជា Xperia ស៊េរី XZ1 នៅឯព្រឹត្តិការណ៍ពិព័រណ៍ផលិតផលអេឡិចត្រូនិចពិភពលោកប្រចាំឆ្នាំនោះទេ តែក្រុមហ៊ុននឹងបញ្ចេញស្មាតហ្វូនលំដាប់ថ្នាក់កណ្តាលត្រកូល XA និង L ព្រមជាមួយផលិតផលបន្ទាប់បន្សំមួយចំនួនផ្សេងទៀត។

របាយការណ៍ដដែលបានលើកឡើងថា ក្រុមហ៊ុន Sony នឹងធ្វើការបើកបង្ហាញស្មាតហ្វូនលំដាប់ថ្នាក់ខ្ពស់ស៊េរីថ្មីរបស់ខ្លួន រួមមានម៉ូឌែល Xperia XZ1 Premium, XZ1 Plus, និង XZ1s នៅឯព្រឹត្តិការណ៍សមាជទូរសព្ទចល័តពិភពលោក WMC 2018 ដែលនឹងប្រព្រឹត្តិពីថ្ងៃទី ២៦ កុម្ភៈ ដល់ថ្ងៃទី ០១ មិនា។ ក្នុងនោះ ម៉ូឌែល Premium នឹងក្លាយជាស្មាតហ្វូនទំនើបបំផុតក្នុងចំណោមស្មាតហ្វូនស៊េរីឆ្នាំ ២០១៨ របស់ក្រុមហ៊ុន។

យោងតាមព័ត៌មានក្រៅផ្លូវការកន្លងមក XZ1 Premium នឹងបំពាក់អេក្រង់ទំហំ ៥.៥ អីុញ ប្រើខ្នាតបញ្ចាំងរូបភាពកម្រិត 4K (២១៦០x៣៨៤០ភិចសែល) ផ្តល់ថាមពលដំណើរការដោយបន្ទះឈីប Snapdragon 845 ដែលជំនាន់ចុងក្រោយបង្អស់របស់ក្រុមហ៊ុន Qualcomm, RAM ទំហំ ៦ ជីហ្គាបៃយ៍, មេម៉ូរីជាប់ម៉ាស៊ីនទំហំ ១២៨ ជីហ្គាបៃយ៍ និងកាមេរ៉ាភ្លោះនៅខាងក្រោយម្ខាងៗទំហំ​ ១២ មេហ្គាភិចសែល ជាមួយបន្ទះស្គេនក្រយៅដៃឋិតនៅខាងក្រោយ។

ដោយឡែក XZ1 Plus និង XZ1s ត្រូវគេរាយការណ៍ថា នឹងបំពាក់កាមេរ៉ាក្រោយភ្លោះ ព្រមទាំងបន្ទះស្គេនដូចជា XZ1 Premium អីចឹងដែរ ប៉ុន្តែ XZ1 Plus មានថាមពលខ្លាំង និងធំជាង XZ1s ដោយ វាមានអេក្រង់ទំហំ ៥.៥​ អីុញ ខ្នាត Full HD និងប្រើបន្ទះឈីប Snapdragon 845 ខណៈ XZ1s ប្រើអេក្រង់ទំហំ ៥.២ អីុញ ខ្នាត Full HD និងបន្ទះឈីប Snapdragon 835។ ម៉ូឌែលទាំងពីរនេះ ត្រូវគេរំពឹងថា នឹងប្រើ RAM និងមេម៉ូរីជាប់ម៉ាស៊ីនទំហំ ៤/៦៤ ជីហ្គាបៃយ៍។

គួររំឭកផងដែរថា ស្មាតហ្វូនលំដាប់កំពូលស៊េរីឆ្នាំ ២០១៨ របស់ក្រុមហ៊ុន Sony បើតាមរូបរាងក្រាហ្វិកបែកធ្លាយចុងក្រោយ គឺវាមានការកែប្រែរចនាបទយ៉ាងធំធេង ធៀបនឹងជំនាន់មុនៗ ជាពិសេស ផ្ទៃអេក្រង់របស់វាគឺធំលាតកប់គែមសងខាង និងបន្សល់ទុកស៊ុមលើក្រោមដ៏តូចប៉ុណ្ណោះ ដែលនេះ អាចជាកិច្ចខំប្រឹងប្រែងថ្មីរបស់ក្រុមហ៊ុនក្នុងការប្រកួតប្រជែងលើទីផ្សារ ខណៈអ្នកប្រើប្រាស់ស្មាតហ្វូនបច្ចុប្បន្ន និយមទូរសព្ទដែលមានស៊ុមអេក្រង់ស្តើង៕

ប្រភពព័ត៌មានៈ phonearena