ការដាក់ឈ្មោះឱ្យស្មាតហ្វូនលំដាប់ថ្នាក់ខ្ពស់ស៊េរី P របស់ក្រុមហ៊ុន Huawei ឥឡូវនេះលែងស្រពិចស្រពិលហើយ។ លែងស្រពិចស្រពិលក៏ដោយសារតែឈ្មោះរបស់វា ត្រូវបានលេចត្រដែតយ៉ាងច្បាស់នៅលើផ្ទាំងបាដាផ្សព្វផ្សាយមួយ អំពីព្រឹត្តិការណ៍បើកបង្ហាញ​របស់ក្រុមហ៊ុន ក្នុងទីក្រុង Barcelena សម្រាប់ថ្ងៃ ២៧ មីនា។

ទោះយ៉ាងនេះក្តី គេនៅមានមន្ទិលនៅឡើយទាក់ទងទៅនឹងថាតើ សមាជិក P20 មួយណានឹងបំពាក់កាមេរ៉ាក្រោយភ្លោះបីនោះ ព្រោះព័ត៌មានចចាមអារ៉ាមកន្លងមកហាក់បង្ហាញភាពមិនច្បាស់លាស់នៅឡើយ។ តែយើងអាចសន្មិតថា វាច្បាស់ជាម៉ូឌែល P20 Pro ដែលត្រូវបានផ្លាស់ប្តូរឈ្មោះពី P20 Plus ជាមិនខាន។

នៅលើបាដានោះដែរ គឺមានភ្ជាប់ជាមួយពាក្យមួយឃ្លាដែលចង់សង្កត់ធ្ងន់ទៅលើបច្ចេកវិទ្យា AI និងការចាប់កំណើតថ្មីនៃការថតរូបដែលកំពុងខិតជិតចូលមក​ដល់។

គួររំឭកថា P20 Pro ដែលពីមុនមានឈ្មោះ P20 Plus ត្រូវគេរាយការណ៍មកថា នឹងប្រើប្រាស់ថ្មទំហំរហូតដល់ ៤០០០ មីល្លីអំព៊ែរ ហើយអាចនឹងបំពាក់អេក្រង់ទំហំ ៦ អីុញ ប្រភេទ OLED និងកាមេរ៉ាក្រោយដល់ទៅបីគ្រាប់ មានទំហំសរុប ៤០ មេហ្គាភិចសែល អាចយឹតរូបភាព​មកជិតបាន ៥ តង់ ខណ:កាមេរ៉ាមុខនឹងមានទំហំ ២៤ មេហ្គាភិចសែល។ ​កាមេរ៉ាទាំងអស់ គឺកើតចេញពីការអភិវឌ្ឍរួមគ្នាជា​មួយ​ក្រុមហ៊ុនផលិតកាមេរ៉ាកម្រិតខ្ពស់របស់អាល្លឺម៉ង់ Lieca។

Huawei P20 Pro នឹងមានកម្រាស់ស្តើងជាង Mate 10 Pro ប៉ុន្តែ មិនមានរចនាបទ​អេក្រង់គ្មានស៊ុមនោះទេ ហើយផ្តល់ថាមពលប្រតិបត្តិការដោយបន្ទះ ឈីប Kirin 970 និង Android 8.1 Oreo ចេញពីប្រអប់។

បើធៀបជាមួយ Mate 10 គែមអេក្រង់លើក្រោមរបស់ P20 Pro គឺស្តើងជាងបន្តិច ដែលល្មមសម្រាប់បំពាក់កាមេរ៉ាថ្មីរបស់ក្រុមហ៊ុនឈ្មោះ Point Cloud Depth Camera ដែលស្រដៀងទៅនឹង TrueDepth Camera របស់ក្រុមហ៊ុន Apple៕