សេអ៊ូលៈ ក្រុមហ៊ុន Samsung ត្រូវបានគេដឹងថា នៅពេលនេះកំពុងតែស្វែងរក​ដៃគូសហការ​ក្នុងការផលិតថ្ម សម្រាប់ស្មាតហ្វូន Galaxy S8 បន្ទាប់ពី​ថ្ម​របស់ Galaxy Note 7 ផ្ទុះឆេះ និងធ្វើឲ្យខាតបង់នូវទឹកប្រាក់រាប់ពាន់លានដុល្លារ។

ប្រភពព័ត៌មានពីកូរ៉េខាងត្បូង បានបញ្ជាក់ថា ក្រុមហ៊ុន Samsung បានប្រកាសស្វែងរក​ដៃ​គូ​សហការក្នុងការផ្គត់ផ្គង់ថ្ម សម្រាប់ Galaxy S8 ប៉ុន្តែអ្វីដែលគេដឹងច្បាស់មួយទៀតនោះគឺ LG ប្រហែលជាត្រូវបាន Samsung ផ្ដល់សិទ្ធិឲ្យផ្គត់ផ្គង់ថ្ម Galaxy S8។

LG ជាដៃគូប្រកួតប្រជែងរបស់ Samsung ចុះហេតុអ្វីបានជាត្រូវជ្រើសរើសឲ្យមក​ផ្គត់ផ្គង់ថ្ម​​សម្រាប់ស្មាតហ្វូនរបស់ខ្លួនទៅវិញ? យើងងាកទៅលើថ្មរបស់ Galaxy Note 7 វិញ គឺវា​ត្រូវ​បានផលិតឡើងដោយក្រុមហ៊ុន SDI ដែលជាបុត្រសម្ព័ន្ធរបស់ Samsung ដូច្នេះ ក្រោយ​ពេល​មានបញ្ហាគឺ Samsung មិនអាចរករឿង ឬឲ្យខាង SDI សងសំណងនោះបានទេ ដូច្នេះ​ហើយត្រូវជួលក្រុមហ៊ុនផ្សេងឲ្យផ្គត់ផ្គង់ជំនួស ព្រោះបើសិនជាមានបញ្ហា គឺខាងក្រុមហ៊ុនផ្គត់ផ្គង់នឹងចេញសងថ្លៃខូចខាត៕