ព័ត៌មានបច្ចេកវិទ្យា

តូចតែមួយសោះ អាចឱ្យទូរសព្ទ Android អ្នកក្លាយជាកាមេរ៉ា 360 ដឺក្រេបាន!

Rylo គឺជាកូនកាមេរ៉ាថតវីដេអូ 360 ដ៏មានថាមពលមួយ អាចយកទៅប្រើសម្រាប់​បំពាក់ជាមួយស្មាតហ្វូនបាន។ ពីមុនក្រុមហ៊ុនបង្កើតវា បានបង្កើតកម្ម​វិធីសម្រាប់បញ្ជាលើកាមេរ៉ានេះ តែលើ iPhone និងមានតែក្នុង App Store ប៉ុណ្ណោះ។

តែឥឡូវ វានឹងអាចគាំទ្រជាមួយទូរសព្ទពពួក Android ស៊េរីក្រោយៗ ដោយក្រុមហ៊ុនបង្កើតវាបានបើកទទួលការកម្ម៉ង់ទិញកាមេរ៉ាដ៏តូចច្រឡិងនេះ តាមគេហ​ទំព័​រ​របស់ខ្លួន។

ទោះយ៉ាងណា កម្មវិធីនោះនៅត្រូវការការកែតម្រូវបន្តិចបន្តួចជាមួយប្រភេទរន្ធ​ដោតរបស់ទូរសព្ទពពួក​ Android ដូចជា micro-USB និង USB-C ដែលខុសពីរបស់ទូរសព្ទ iPhone ដែលជាប្រភេទ Lightning។

គួរបញ្ជាក់ថា កម្មវិធីកាមេរ៉ា ៣៦០ របស់ក្រុមហ៊ុន Rylo ដែលកំពុងដាក់បង្ហោះ លើ App Store គឺមិនត្រឹមតែអាចប្រើសម្រាប់បើកមើលរូបភាព និងវីដេអូប្រភេទរង្វិលជុំ ៣៦០ ដឺក្រេប៉ុណ្ណោះទេ ប៉ុន្តែ វាក៏មានភ្ជាប់ទៅជាមួយមុខងារកែ​កុន និងកាត់ឱ្យវីដេអូ ៣៦០ ទៅជាវីដេអូធម្មតាផងដែរ។

កិច្ចខំប្រឹងប្រែងនេះ គឺធ្វើឡើងដើម្បីប្រកួតប្រជែងជាមួយមុខងារ OverCapture នៅលើកាមេរ៉ា GoPro ម៉ូឌែល Fusion ហើយវាកំពុងដាក់លក់ក្នុងតម្លៃរាយ ៤៩៩ ដុល្លារ (តម្លៃបរទេស)៕

ប្រភពព័ត៌មាន: techcrunch

មតិយោបល់