អាមេរិក៖ បើយើងក្រឡេកទៅមើលក្រោយឆ្នាំ ២០០៩ ក្រុមហ៊ុន Nokia បានក្តោបទីផ្សារទូរស័ព្ទ ជាពិសេសគឺ​ទីផ្សារស្មាតហ្វូន រហូតដល់ ៧០ភាគរយនៃស្មាតហ្វូនសរុបដែលបានលក់នៅទូទាំងសកលលោក ប៉ុន្តែក្រោយ​ពី​ឆ្នាំ ២០០៩ ទីផ្សារស្មាតហ្វូនត្រូវបាន Apple និង Samsung កាន់កាប់រហូតដល់សព្វថ្ងៃ។

នៅឆ្នាំ ២០១៣ ក្រុមហ៊ុន Nokia បានសម្រេចលក់អាជីវកម្មទូរស័ព្ទចល័ឲ្យទៅក្រុមហ៊ុន Microsoft ក្នុងតម្លៃ ៧,២ពាន់លានដុល្លារអាមេរិក ប៉ុន្តែការលក់នេះ មិនមែនមានន័យថា Nokia បោះបង់​​ទីផ្សារទូរស័ព្ទឡើយ ព្រោះ​នៅក្នុងលក្ខខណ្ឌនៃកិច្ចព្រមព្រៀង នៅចុងឆ្នាំ ២០១៦នេះ ក្រុមហ៊ុន Nokia មានសិទ្ធិផលិតស្មាតហ្វូន​វិញ​បាន ប៉ុន្តែមិនអាចប្រើឈ្មោះ Lumia ឡើយ។

តើ Nokia អាចនឹងវិញត្រឡប់មកផ្ដើមជាថ្មី ក្នុងការផលិតទូរស័ព្ទដៃទំនើបៗដែរ ឬទេ? ពាក់ព័ន្ធនឹង​សំណួរនេះ​ ត្រូវបានលោក Rajeev Suri នាយកប្រតិបត្តិ Nokia ថ្លែងប្រាប់អ្នកសារព័ត៌មាន​ថា ក្រុមហ៊ុន Nokia មិន​បោះបង់​ការផលិត​ទូរស័ព្ទដៃ​ទំនើប ឬស្មាតហ្វូនឡើយ ប៉ុន្តែវាមិនទាន់ដល់ពេល​ដែល​ត្រូវ​ចាប់​ផ្ដើម ព្រោះនៅ​ពេលនេះ Nokia កំពុងស្វែង​រកដៃគូសហការ​ដែលមាន​ឥទ្ធិពល។

គួរបញ្ជាក់ផងដែរថា កាលពីដើមឆ្នាំនេះ Nokia បានចេញលក់ Table N1 នៅទីផ្សារប្រទេសចិនដើម្បី​សាកល្បង ហើយជាលទ្ធិផលគឺទទួលបានជោគជ័យ ប៉ុន្តែ Nokia មិនបានយក N1 ទៅលក់បន្តនៅទីផ្សារ​ផ្សេងឡើយ៕