ប៉េកាំងៈ ក្រុមហ៊ុនផ្គត់ផ្គង់ធំបំផុតរបស់ Apple គឺ Foxconn នៅថ្ងៃនេះ បានប្រកាសឲ្យដឹងថា ខ្លួនបាន​ចំណាយ​លុយជិត ៤ពាន់លានដុល្លារអាមេរិក ទិញក្រុមហ៊ុនអេឡិចត្រូនិកជប៉ុន Sharp ខណៈដែល​ក្រុមហ៊ុនមួយនេះ កំពុងជួបវិបត្តិ​ហិរញ្ញវត្ថុ​។

យោងតាមការចេញផ្សាយរបស់សារព័ត៌មាន WSJ បានឲ្យដឹងថា ក្រុមហ៊ុន Foxconn បានចំណាយលុយ ៣.៨ពាន់លាន​ដុល្លារអាមេរិក ទិញយកភាគហ៊ុន​របស់ក្រុមហ៊ុន Sharp ក្នុងចំណែក ២ភាគ៣ ដោយបានជំរុញឲ្យ Foxconn ក្លាយជា​ម្ចាស់​ភាគហ៊ុនធំជាងគេបំផុត។

ក្រុមហ៊ុន Foxconn បានចាប់អារម្មណ៍ទៅលើក្រុមហ៊ុន Sharp ក្នុងគោលដៅសម្រាប់ពង្រីកទីផ្សារ​ផលិតអេក្រង់​សម្រាប់​ស្មាតហ្វូន ខណៈដែល Sharp ក៏ជាអ្នកផ្គត់ផ្គង់អេក្រង់របស់ iPhone​ ហើយបើតាមព័ត៌មានចចាមអារ៉ាម ដែលបាន​ផ្សព្វផ្សាយថា iPhone ឆ្នាំ២០១៧ នឹងមានអេក្រង់ជាប្រភេទ OLED នោះ អាចនឹងក្លាយជាការពិត៕