ចិន៖ បុគ្គលិកជាន់ខ្ពស់មួយរូបរបស់ក្រុមហ៊ុន Nokia បានអះអាងថា ស្មាតហ្វូន និង Tablet ដំបូងរបស់ Nokia នឹងបង្ហាញខ្លួននៅចុងឆ្នាំនេះ បន្ទាប់ពីលក្ខខណ្ឌនៃកិច្ចព្រមព្រៀងជាមួយក្រុមហ៊ុន Microsoft ត្រូវបានបញ្ចប់។

លោក Mike Wang ប្រធានក្រុមហ៊ុន Nokia ប្រចាំប្រទេសចិន បានបញ្ជាក់ និងអះអាងប្រាប់ទស្សនាវដ្ដី The Paper ថា ឧបករណ៍ថ្មីរបស់ Nokia ប្រហែលជា ៣ ឬ៤ នឹងត្រូវបង្ហាញខ្លួននៅក្នុងត្រីមាសទី៤ឆ្នាំនេះ ក្នុងនោះរួមមានទាំងស្មាតហ្វូន និង Tablet ដែលសុទ្ធសឹងតែប្រើប្រាស់ប្រព័ន្ធដំណើរការ Android។

កាលពីដើមឆ្នាំនេះ ក្រុមហ៊ុន Nokia ក៏ធ្លាប់បានបញ្ជាក់ឲ្យដឹងម្ដងរួចហើយដែរថា ខ្លួននឹងវិលត្រឡប់មកកាន់ទីផ្សារទូរស័ព្ទដៃជាមួយនឹងស្លាកសញ្ញា Nokia ប៉ុន្តែប្រើប្រាស់ប្រព័ន្ធដំណើរការ Android។

គួរបញ្ជាក់ផងដែរថា ក្រុមហ៊ុន Nokia បានលក់អាជីវកម្មទូរស័ព្ទចល័តឲ្យទៅ Microsoft កាលពីឆ្នាំ ២០១៤ ជាមួយនឹងតម្លៃ ៧,២ពាន់លានដុល្លារអាមេរិក ដោយក្នុងនោះ លក្ខខណ្ឌត្រូវបានកំណត់ថា ក្រុមហ៊ុន Nokia គ្មានសិទ្ធិផលិតទូរស័ព្ទដៃ ប្រើស្លាកសញ្ញា Nokia រហូតដល់ត្រីមាសទី៤ ឆ្នាំ២០១៦៕