អាមេរិក៖ ក្រុមហ៊ុន Samsung បានប្រកាសប្រមូល Galaxy Note 7 ជាផ្លូវការនៅជុំវិញពិភពលោក បន្ទាប់ពី​មានសេចក្ដីរាយការណ៍មកថា ស្មាតហ្វូន Galaxy Note 7 ផ្ទុះឆេះខណៈពេលកំពុងសាកថ្ម។ តើ​ការផ្ទុះឆេះនេះ បណ្ដាលមកពីហេតុអ្វី? ក្រុមហ៊ុន Samsung បានអះអាងថា មកពីបញ្ហាថ្ម។ តោះ! យើង​ទៅស្ដាប់អ្នកជំនាញពន្យល់ពី​បញ្ហានេះម្ដង។

លោក Donal Finegan វិស្វករគីមីនៅសាកលវិទ្យាល័យ University College London បានឲ្យដឹងថា «បញ្ហាថ្ម កម្រកើតមានណាស់ ទៅលើការផ្ទុះឆេះ ប៉ុន្តែវាអាចពាក់ព័ន្ធទៅនឹង​លទ្ធភាពនៃផ្ទុកថ្ម ឬកំហុសបច្ចេកទេសផ្សេង»។

លោក Finegan បានបន្ថែមទៀតថា ការផ្ទុះឆេះខណៈពេលកំពុងសាកថ្ម អាចជាកំហុសរបស់​ក្រុមហ៊ុន​ផ្គត់ផ្គង់ថ្ម ដោយសារតែ​ពួកគេមិនបានយកចិត្តទុកដាក់ទៅលើការផលិត ដូចជាមិនបានពិនិត្យមើលទៅ​លើគុណភាពនៃការប្រើប្រាស់ ជាពិសេសគឺមិនបានកំណត់ឲ្យផ្ដាច់​ការ​សាកថ្មដោយស្វ័យប្រវត្ត នៅពេលដែលថ្មត្រូវបានសាកពេញលេច ដែលចំណុចនេះ អាចធ្វើឲ្យចរន្តអគ្គីសនី នៅតែបន្តជ្រាបចូលទៅកា​ន់ឃ្លាំងផ្ទុកថ្ម ខណៈដែល​ឃ្លាំងផ្ទុកថ្មនោះ អស់លទ្ធភាព​ក្នុងការផ្ទុក។

ទាំងនេះគឺជាការពន្យល់របស់លោក Finegan ប៉ុន្តែខាងក្រុមហ៊ុន Samsung មិនបានពន្យល់ដូច្នេះទេ គ្រាន់តែបញ្ជាក់នៅពេលនេះ កំពុងតែ​ធ្វើការស៊ើបអង្កេត ខណៈដែលលទ្ធផលបណ្ដោះអាសន្ន​រកឃើញថា មកពីថ្ម ទើបណ្ដាលឲ្យផ្ទុះឆេះ។

គួរបញ្ជាក់ផងដែរថា ក្រុមហ៊ុន Samsung បានបញ្ជាក់ថា មាន Galaxy Note 7 ត្រឹមតែ ៣៥គ្រឿងប៉ុណ្ណោះ ដែលមានបញ្ហា ប៉ុន្តែសារព័ត៌មាន Phone Arena បានចុះផ្សាយថា នោះគឺជាតួលេខ​មិនពិតឡើយ៕