អាមេរិកៈ នៅទីបំផុត ក្រុមហ៊ុនយក្សអាមេរិក Google បានប្រកាសបង្ហាញស្មាតហ្វូន​ថ្មីសន្លាង​​ ដែល​បំពាក់ដោយមុខងារពិសេសៗ រួមជាមួយសមត្ថភាពដ៏អស្ចារ្យ ក្នុងគោលដៅវាយលុកទីផ្សារស្មាតហ្វូន​ជាថ្មីម្ដងទៀត ក្រោយពេលលាក់ខ្លួនអស់ជាច្រើនឆ្នាំ។

Pixel និង Pixel XL ជាស្មាតហ្វូនថ្មី ដែលក្រុមហ៊ុន Google ទើបតែប្រកាសបង្ហាញ ដោយ​មួយមាន​អេក្រង់ទំហំ ៥អ៊ីង និងមួយទៀតមានអេក្រង់ទំហំ ៥.៥អ៊ីង។ វាមិនមែនជារឿងចម្លែកនោះទេ ដែល​ស្មាតហ្វូនទាំងពីរនេះ ប្រើប្រាស់ប្រព័ន្ធដំណើរការ Android ជំនាន់ចុងក្រោយបំផុត ព្រោះថា Android ជាប្រព័ន្ធដំណើរការរបស់ Google ប៉ុន្តែអ្វីដែល​អស្ចារ្យនោះគឺថា Google បើកដៃ ដោយផ្ដល់នូវ​ទំហំ​​សម្រាប់រក្សារូបភាព និងវីដេអូ ឥតកំណត់សម្រាប់អតិថិជន Pixel និង Pixel XL ខណៈដែល​ទំហំ Storage ក្នុងម៉ាស៊ីនមាន 32GB និង 128GB។

ក្រុមហ៊ុន Google បានបញ្ជាក់ថា ស្មាតហ្វូនទាំងពីរនេះ គឺក្រុមហ៊ុន HTC ជាអ្នកផលិត ហើយ​នឹង​ដាក់​លក់​ចាប់ពីតម្លៃ ៦៤៩ដុល្លារអាមេរិក ដោយនៅពេលនេះ មានប្រទេសចំនួន ៥អាចធ្វើការបញ្ជាទិញ​ទុក​មុនបាន ដូចជាចក្រភពអង់គ្លេស សហរដ្ឋអាមេរិក អូស្ត្រាលី កាណាដា និងអាល្លឺម៉ង់៕