ក្រុមហ៊ុនថៃ បានចុះមកសិក្សាស្វែងយល់ពី បំណងវិនិយោគនៅកម្ពុជា ក្នុងការបង្កើតរោងចក្រផលិតដែកសំណង់ ដើម្បីផ្គត់ផ្គង់ទីផ្សារក្នុងស្រុក និងនាំចេញទៅក្រៅប្រទេស។ នេះបើយោងតាមការឲ្យដឹងពី ក្រសួងឧស្សាហកម្ម និងសិប្បកម្ម កាលពីម្សិលមិញនេះ។

លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានឲ្យដឹងថា ក្រុមហ៊ុន ចង់ជ្រើសរើសយកទីតាំងនៅខេត្តព្រះសីហនុ ឬកំពត និងមានបំណងធ្វើកំពង់ផែខ្លួនឯង ព្រោះងាយស្រួលក្នុងការដឹកវត្ថុធាតុដើមនាំចូល និងនាំផលិតផលសម្រេចចេញទៅក្រៅប្រទេស។

លោកក៏បានបង្ហាញពី អត្ថប្រយោជន៍នៃការផលិតនាំចេញពីកម្ពុជា ទៅកាន់ទីផ្សារក្រៅប្រទេសជាច្រើនដោយរួចពន្ធ និងមិនជាប់កូតាដូចជា ទីផ្សារសហគមន៍អឺរ៉ុប កាណាដា ជប៉ុនជាដើម។

គួររម្លឹកដែរថា ក្រុមហ៊ុន SVI ដែលមានមូលដ្ឋាននៅប្រទេសថៃ ក៏បានសម្រេចបោះទុនជាង ៦០០លានដុល្លារអាមេរិក ដើម្បីបង្កើតរោងចក្រនៅក្នុង តំបន់សេដ្ឋកិច្ចពិសេសភ្នំពេញ ហើយនឹងផលិតគ្រឿងអេឡិចត្រូនិកដូចជា បង្គុំកាមេរ៉ា កុំព្យូទ័រ និងទូរស័ព្ទ។

រោងចក្រ នឹងស្ថិតនៅលើផ្ទៃដីជាង ១០ហិកតា ដែលគ្រោងនឹងដំណើរការនៅដើមឆ្នាំ ២០១៨ ហើយផ្តល់ការងារជូនប្រជាពលរដ្ឋប្រមាណជាង ៧,០០០កន្លែង។

គួរជម្រាបដែរថា ប្រទេសកម្ពុជា ជាប្រទេសទី ៤ ដែលក្រុមហ៊ុន បានសហការវិនិយោគជាមួយ ហើយក៏មានពលករខ្មែរ ៧០០នាក់ ត្រូវបានបញ្ជូនទៅសិក្សានៅប្រទេសថៃផងដែរ៕