ឥណ្ឌូនេស៊ី: អ្នកនាំពាក្យទីភ្នាក់ងារគ្រោះមហន្តរាយ បានឲ្យដឹងថា ភ្លៀងធ្លាក់យ៉ាងខ្លាំង និងរអិលបាក់ដី នៅខេត្ត West Java ភាគខាងលិចប្រទេសឥណ្ឌូនេស៊ីពេញមួយយប់ រហូតដល់ព្រឹកថ្ងៃពុធនេះ បានបណ្ដាលឲ្យមនុស្ស ១០ នាក់ស្លាប់ ៣០ នាក់រងរបួស ខណ:មនុស្ស ៣នាក់កំពុងបាត់ខ្លួន និងរាប់រយនាក់ផ្សេងទៀត បានផ្លាស់ប្តូរទីលំនៅដ្ឋាន។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២១ ខែកញ្ញា ឆ្នាំ២០១៦។

គ្រោះទឹកជំនន់នេះ បានកើតទ្បើងវេលាម៉ោងប្រហែល ១ ទៀបភ្លឺ (ម៉ោងក្នុងទីក្រុងហ្សាកាតា) ស្ថិតនៅតាមតំបន់មួយចំនួនក្នុងស្រុក Garut បន្ទាប់ពីទន្លេពីរជន់ហៀរ ដោយភ្លៀងធ្លាក់ខ្លាំង។

បើតាមអ្នកនាំពាក្យ បានឲ្យដឹងបន្ថែមថា មនុស្ស ៨ នាក់ស្លាប់ ៣០ នាក់រងរបួស ក្នុងគ្រាដែលម្នាក់ទៀត បានបាត់ខ្លួន ដោយសារគ្រោះទឹកជំនន់។

នៅក្នុងស្រុក Sumedang មានករណីរអិលបាក់ដី បានវាយប្រហារផ្ទះពីរខ្នង បណ្ដាលឲ្យមនុស្ស ២ នាក់ស្លាប់ និង ២នាក់ផ្សេងទៀតបាត់ខ្លួនកាលពីថ្ងៃអង្គារ។

មកទល់ពេលនេះ ប្រតិបត្ដិការស្វែងរក សម្រាប់អ្នកបាត់ខ្លួន ជាមួយនឹងកិច្ចខិតខំប្រឹងប្រែងសង្គ្រោះបន្ទាន់ ដោយទាហាន ប៉ូលិស មកពីទីភ្នាក់ងារគ្រោះមហន្តរាយ និងការិយាល័យស្វែងរក និងសង្គ្រោះក្នុងស្រុក កំពុងដំណើរការ៕