កូរ៉េ: ក្រុមអ្នកតវ៉ារហូតដល់ទៅកន្លះលាននាក់ ត្រូវបានគេរំពឹងថា នឹងដើរហែជាក្បួនតាមដងផ្លូវ ក្នុងទីក្រុងសេអ៊ូលនាថ្ងៃសៅរ៍សប្តាហ៍ទី៤ ខាងមុខ ដើម្បីទាមទារឲ្យលោកស្រីប្រធានាធិបតី Park Geun -hye លាលែងពីតំណែង ជុំវិញរឿងអាស្រូវអំពើពុករលួយ។ នេះបើយោងតាមរយ: សារព័ត៌មាន Bangkok Post ចេញផ្សាយនៅថ្ងៃទី១៩ ខែវិច្ឆិកា ឆ្នាំ២០១៦។

ហេតុការណ៍នេះ ត្រូវបានចាត់ទុកថា ជាមហាបាតុកម្មដ៏ធំជាងគេបំផុត នៅកូរ៉េខាងត្បូង ចាប់តាំងពីការតវ៉ាគាំទ្រលទ្ធិប្រជាធិបតេយ្យ ក្នុងទសវត្សឆ្នាំ ១៩៨០ ។ ជុំវិញការធ្វើបាតុកម្មនេះ បានធ្វើឲ្មានយប្រឈមបញ្ហាជាខ្លាំង សម្រាប់ការគ្រប់គ្រងរដ្ឋាភិបាលលោកស្រី Park ប៉ុន្តែខាងប្រធានាធិបតី ហាក់នៅតែផ្គើនចំពោះការអំពាវនាវឲ្យចុះចេញពីតំណែងនេះ។

រហូតមកដល់ពេលនេះ បាតុកម្មតវ៉ាបានធ្វើទ្បើង ដោយសន្តិវិធីជាមួយនឹងការចូលរួមពីក្រុមគ្រួសារជាច្រើន ប៉ុន្តែនៅតែមានវត្តមានប៉ូលិសការពារសន្តិសុខនាថ្ងៃសៅរ៍ខាងមុខ ដោយមានរថយន្តក្រុង និងរថយន្តដឹកទំនិញ សម្រាប់ដំណើរការរាំងផ្លូវចូលទៅកាន់កាលរិយាល័យប្រធានាធិបតី Blue House។

ក្រុមអ្នកតវ៉ាទាំងនោះ ត្រូវបានគេរំពឹងថា នឹងទៅជួបជុំគ្នានៅតាមបណ្តោយមហាវិថី Gwanghwamun នៃទីក្រុងសេអ៊ូល នៅវេលាម៉ោង ៥ ល្ងាច (ម៉ោងក្នុងស្រុក) ដើម្បីស្តាប់សុន្ទរកថាមួយ មុនពេលពួកគេធ្វើដំណើរឆ្ពោះទៅកាន់ កាលរិយាល័យប្រធានាធិបតី Blue House និងរបាំងរារាំងប៉ូលិស៕