ក្រិក: ពលរដ្ឋជាង៧ម៉ឺននាក់ ត្រូវបានជម្លៀសចេញពីគេហដ្ឋានរបស់ខ្លួន នៅក្នុង Thessaloniki ជាទីក្រុងធំជាងគេបង្អស់ទី២ នៅប្រទេសក្រិក ដើម្បីអនុញ្ញាតឲ្យអ្នកជំនាញ អាចដោះគ្រាប់បែក ដែលនៅសេសសល់ពីសង្គ្រាមលោកលើកទី២។ នេះបើយោងតាមសារយ:ព័ត៌មាន BBC ចេញផ្សាយនៅថ្ងៃទី១៣ ខែកុម្ភ: ឆ្នាំ២០១៧។
គ្រាប់បែកនេះ មានផ្ទុកសារធាតុផ្ទុះទម្ងន់ ២៥០គីឡូក្រាម ត្រូវបានរកឃើញនៅក្រោមដីជម្រៅ៥ម៉ែត្រ ក្នុងអំឡុងពេលនៃដំណើរការជីករណ្តៅនៅឯស្ថានីយ៍ប្រេងឥន្ធន:មួយ កាលពីសប្តាហ៍មុន។
ប៉ូលិសបានប្រាប់ប្រជាពលរដ្ឋរស់នៅ ក្នុងរង្វង់បរិវេណដី ២គីឡូម៉ែត្រ ដែលភាគច្រើននៅប៉ែកខាងលិចជាយក្រុង Kordelio ឲ្យចាកចេញពីគេហដ្ឋានរបស់ខ្លួន។
ពលរដ្ឋជាច្រើនចាកចេញដោយជិះរថយន្តផ្ទាល់ខ្លួន ប៉ុន្តែពលរដ្ឋមួយចំនួនទៀតត្រូវបានដឹកជញ្ជូនដោយរថយន្តក្រុងទៅកាន់សាលារៀន និងកន្លែងលេងកីឡាផ្សេងៗនៅក្នុងទីក្រុង ដែលនៅទីនោះពួកគេអាចរកស្បៀងអាហារ និងទីជម្រកបាន។
អាជ្ញាធរក្នុងតំបន់បានឲ្យដឹងថា ប្រតិបត្តិការនេះ អាចបន្តដល់ពេញមួយថ្ងៃ ប៉ុន្តែក្រុមយោធាបានឲ្យយោបល់ថា អាចត្រូវការពេលវេលាយូរជាងនេះ ដើម្បីដោះគ្រាប់បែកនេះ និងដឹកជញ្ជូនទៅកាន់កន្លែងមួយនៅក្បែរនេះ ដែលអាចកម្ទេចវាចោលបាន។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្រិក បានឲ្យដឹងថា គ្រាប់បែកនេះ ត្រូវបានទម្លាក់ដោយយន្តហោះចម្បាំងមួយគ្រឿងរបស់អង់គ្លេស ក្នុងអំឡុងពេលនៃការវាយប្រហារផ្លូវអាកាសទៅលើស្ថានីយ៍រថភ្លើងមួយ និងកំពង់ផែមួយ ដែលស្ថិតនៅក្បែរទីក្រុងនោះ កាលពីឆ្នាំ១៩៤៣៕
មតិយោបល់