Post News Media ព័ត៌មានអន្តរជាតិ ក្រោយជប៉ុន អា...

ក្រោយជប៉ុន អាមេរិក និងកូរ៉េខាងត្បូងផ្ទុះ​កំហឹង អង្គការសហប្រជាជាតិ បានបើកកិច្ចប្រជុំជាបន្ទាន់

UN: ក្រុម​ប្រឹក្សា​សន្តិសុខអង្គការសហប្រជាជាតិ បានបើកកិច្ចប្រជុំជាបន្ទាន់ បន្ទាប់មានការស្នើពីសហរដ្ឋអាមេរិក ជប៉ុន និង​ប្រទេស​កូរ៉េខាង​ត្បូង​ ពាក់ព័ន្ធនឹងការបាញ់បង្ហោះ​កាំជ្រួចមីស៊ីល​ផ្លោង​របស់កូរ៉េខាងជើង កាល​ពី​ថ្ងៃអាទិត្យ​​។ នេះយោងតាមរយ:សារព័ត៌មាន BBC ចេញផ្សាយនៅថ្ងៃទី១៤ ខែកុម្ភ: ឆ្នាំ២០១៧។​

​មន្ត្រី​យោធា​កូរ៉េខាង​ត្បូង បាននិយាយថា កាំជ្រួច​មីស៊ីល ដែលបានបាញ់បង្ហោះ​នេះ​ អាចហោះ​បាន​ចម្ងាយ​ប្រមាណ​៥០០ គីទ្បូម៉ែត្រ នៅ​មុន​ពេល​វា​ធ្លាក់​ចូលក្នុង​សមុទ្រ​ជប៉ុន។​

លោក Geng Shuang អ្នក​នាំពាក្យ​នៃក្រសួង​ការបរទេស​ចិន​ បាននិយាយ​កាលពីថ្ងៃ​ចន្ទ​ថា ​​ចិន​បានប្រឆាំងទៅនឹង ការបាញ់បង្ហោះ​កាំ​ជ្រួច​របស់កូរ៉េខាងជើងផងដែរ ​ដោយបានលើកទ្បើងថា វាជាសកម្មភាព​រំលោភ​លើ​សេចក្តី​សម្រេចចិត្ត​របស់ក្រុម​ប្រឹក្សា​សន្តិសុខអង្គការសហប្រជាជាតិ បើទោះបីកូរ៉េខាងជើងជាសមមិត្តនឹងខ្លួនក៏ដោយ។ ​លោកបាននិយាយ​បន្ថែម​ថា ​ប្រទេស​ចិន​ដែល​ជា​សមាជិក​មួយ​នៃ​ក្រុម​ប្រឹក្សា​សន្តិសុខ​អង្គការសហប្រជាជាតិ សុំ​ដល់​ភាគី​ទាំង​អស់​ឲ្យ​ទប់ចិត្ត​ កុំ​ធ្វើ​សកម្មភាព​បង្ករឿង​ហេតុហើយ​ថា ​ចិន​មាន​ជំនឿ​ថា ​ការ​សន្ទនា​គ្នា​ជា​មាគ៌ា​ទៅ​កាន់​ដំណោះ​ស្រាយ​បានយ៉ាងប្រសើរ។​

លោកនាយករដ្ឋមន្ត្រី​ជប៉ុន Shinzo Abe បានហៅ​សកម្មភាពរបស់​កូរ៉េខាង​ជើង​ថា​ មិន​អាច​អត់ឱន​ឲ្យបាន​ជា​ដាច់ខាត ដែលសេចក្តីអត្ថាធិប្បាយ​របស់​លោក Abe ធ្វើឡើង​នៅ​ក្នុង​សន្និសីទ​កាសែតមួយ​ ជាមួយ​ប្រធានាធិបតី​សហរដ្ឋអាមេរិកលោក Donald Trump នៅ​ក្នុង​ឱកាសទស្សកិច្ច​មួយ ​ក្នុង​រដ្ឋ​ Florida៕