Post News Media ព័ត៌មានអន្តរជាតិ ហេតុអ្វីបានជា...

ហេតុអ្វីបានជាគេសម្លាប់ បងប្រុសមេដឹកនាំផ្ដាច់ការកូរ៉េខាងជើង?

អាមេរិក: ​មានការលើកទ្បើងយ៉ាងទូលំទូលាយមួយ​​ថា ការ​ស្លាប់​របស់​លោក គីម ជុងណាំ ត្រូវ​បាន​ធ្វើ​ឡើង​ដោយ​មន្ត្រី​ជាន់ខ្ពស់​នៅ​ក្រុង​ព្យុងយ៉ាង ហើយ​ទំនងជា​ក្រោម​បញ្ជា​របស់​លោក លោក គីម ជុងអ៊ុន តែ​ម្តង។

ប្រធានាធិបតី​ស្តីទី​ និង​នាយករដ្ឋមន្ត្រី​កូរ៉េខាងត្បូង ​លោក Hwang Kyo-ahn បាន​និយាយ​ថា ប្រសិន​បើ​មាន​ការលាតត្រដាង​ថា ការ​ស្លាប់​របស់​លោក គីម ជុងណាំ ត្រូវ​បាន​ប្រព្រឹត្ត​ឡើង​ ដោយ​រដ្ឋាភិបាល​កូរ៉េខាងជើង វា​នឹង​ជា​រឿងក្តី​មួយ ដែលបង្ហាញ​ពី​ភាព​សាហាវយង់ឃ្នង​ និង​អមនុស្សធម៌​នៃ​របបដឹកនាំរបស់​លោក គីម ជុងអ៊ុន។

លោក គីម ជុងណាំ ត្រូវ​បាន​គេ​ចាត់​ទុក​ថា ជាមនុស្សម្នាក់ ដែលបង្កការ​គំរាមកំហែង​មួយ​ ទៅ​ដល់​ការ​ដឹកនាំ​របស់​ប្អូនប្រុស​របស់​គាត់ ដោយសារ​តែ​ការ​និយាយ​រិះគន់​ឥត​សំចៃ​ពី​អំពើ​គាបសង្កត់ និងភាព​ផ្តាច់ការ​នៅ​ក្នុង​ប្រទេស (កូរ៉េខាងជើង) ខណ:ដែលរូបគាត់​ហាក់មានទំនរ​គាំទ្រ​គោលនយោបាយ​កែទម្រង់​ ដែល​នឹង​បន្ធូរបន្ថយ​ការ​ត្រួតត្រា​របស់​រដ្ឋតាមបែបលទ្ធិប្រជាធិបតេយ្យជាគោល និងក៏មានការគាំទ្រពីប្រធានាធិបតី​ចិន​លោកស៊ី ជីនពីង​ចង់​ឲ្យ​រូបគាត់​ឡើង​ជំនួស​ប្អូនប្រុស​របស់​គាត់ ​ជាមេដឹកនាំ​កូរ៉េខាងជើង ក្រោយចិនហាមកូរ៉រខាងជើងមិនស្តាប់ ក្នុងការបាញ់គ្រាប់មីស៊ីល។

យោងតាមរបាយការណ៍នៃវិទ្យាស្ថាន​សន្តិសុខ​ជាតិ​​កូរ៉េខាងត្បូង ​ក្នុង​ខែ​ធ្នូ ឆ្នាំ​២០១៦ បាន​អះអាងថា​ លោក គីម ជុងអ៊ុន បាន​បញ្ជា​ឲ្យ​ប្រហារជីវិត​មនុស្ស ៣៤០នាក់ ចាប់តាំង​ពី​ពេល​មេដឹកនាំ​រូបនេះ​ ចូលកាន់​តំណែង​ក្នុង​ខែ​ធ្នូ​ ឆ្នាំ២០១១។ ក្នុង​ឆ្នាំ២០១៣ លោក គីម ជុងអ៊ុន បាន​កាត់ទោស​ប្រហារជីវិត​ឪពុកមា​របស់​ខ្លួន លោក Jang Song Thaek ដែល​ធ្លាប់​ត្រូវ​បាន​គេ​ចាត់ទុក​ថា ជា​ជា​បុរស​ខ្លាំង​ទីពីរ ពីបទពុករលួយ នៅ​ក្នុង​ប្រទេស​ ​ដែលរដ្ឋាភិបាលកូរ៉េ
ខាងជើង​ចោទប្រកាន់ថា​ ជាអំពើ​ក្បត់​ជាតិ។

សូមជំរាបថា លោក គីម ជុងណាំ អាយុ ៤៥ ឆ្នាំ ត្រូវបានគេធ្វើឃាត នៅព្រលានយន្តហោះ ទីក្រុង Kuala Lumpur ប្រទេសម៉ាឡេស៊ី និងបានស្លាប់ក្រោយពេលបញ្ជូន ទៅកាន់មន្ទីរពេទ្យ បន្ទាប់ពីឃាតកស្ត្រីពីរនាក់ ដាក់ថ្នាំបំពុលឲ្យស្លាប់ នៅព្រលានយន្តហោះ។

មន្ត្រីប៉ូលិសជាន់ខ្ពស់ សុំមិនបញ្ចេញឈ្មោះ បាននិយាយថា ផ្អែកតាមការសួរចម្លើយអ្នកបើកតាក់ស៊ី ដែលដឹកស្ត្រី ជាជនសង្ស័យឃាត់កម្ម និងវីដេអូ CCTV ប៉ូលិសបានជឿថា ស្ត្រីពីរនាក់នោះ ជាជនជាតិវៀតណាម៕