ម៉ាទ្បេស៊ី: រដ្ឋមន្ត្រីក្រសួងសុខាភិបាល កាលពីថ្ងៃអាទិត្យ បាននិយាយថា លោកគីម ជុងណាម បានស្លាប់ក្នុងរយ:ពេល ២០ នាទី បន្ទាប់ការវាយប្រហារ ដោយបានទទួលរងនូវការឈឺចាប់ខ្លាំង មុននិងសរីរាង្គនៃរាងកាយទាំងមូលរបស់គាត់ឈប់ដំណើរការ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២៧ ខែកុម្ភ: ឆ្នាំ២០១៧។
នៅក្នុងសន្និសីទមួយ កាលពីថ្ងៃអាទិត្យ រដ្ឋមន្រ្តីក្រសួងសុខាភិបាល លោក S Subramaniam បានប្រាប់អ្នកកាសែតថា តាមរយ:ការធ្វើកោសល្យវិច័យ បូករួមនឹងរបាយការណ៍របស់ប៉ូលិស បានបង្ហាញថា
បងប្រុសម្តាយទីទៃរបស់ប្រមុខដឹកនាំកូរ៉េខាងជើង លោក គីម ជុងអ៊ុន បានស្លាប់ ដោយពុលសារធាតុគីមី មហាពុលបំផុតឈ្មោះ VX ដែលជាពពួកអាវុធគីមីមួយដ៏សាហាវ។ អាវុធគីមួយនេះ មានកម្លាំងពុលខ្លាំង គ្មានប្រៀបឡើយ ខ្លាំងលើអាវុធគីមី ដែលរបបដឹកនាំស៊ីរីធ្លាប់ប្រើកាលពីឆ្នាំ២០១៣ទៅទៀត។
តាមរយ:វីដេអូ CCTV បានបង្ហាញពីសកម្មភាពធ្វើឃាតស្ត្រីពីរនាក់ ដែលឃើញពួកគេបានយករបស់អ្វីមួយ រុញចូលទៅលើមុខរបស់លោក គីម។ ក្នុងឈុតក្រោយមកទៀត លោកគីម បានស្នើសុំការជួយ ពីមន្រ្តីព្រលានយន្តហោះ ដើម្បីទៅពេទ្យ ហើយគាត់បានត្រដុសភ្នែក និងជំពប់ជើងដួល ពេលដែលគាត់ចូលគ្លីនិកព្រលានយន្តហោះ។
លោក Subramaniam បាននិយាយថា « លោក គីម បានដួលសន្លប់ នៅក្នុងគ្លីនិក និងបានស្លាប់នៅក្នុងរថយន្តសង្គ្រោះបន្ទាន់ផងដែរ »។
លោក បានបន្ថែមទៀតថា « គិតចាប់ពីពេលវេលានៃការចាប់ផ្តើម ការវាយប្រហារនោះ គាត់បានស្លាប់ក្នុងរយ:ពេលចន្លោះពី ១៥ ទៅ ២០ នាទីប៉ុណ្ណោះ»៕
មតិយោបល់