ជប៉ុន: ប្រព័ន្ធផ្សព្វផ្សាយកូរ៉េខាងត្បូង ដកស្រង់ប្រភពពីរដ្ឋាភិបាល បានរាយការណ៍ថា ភាពតានតឹងនៅតំបន់អាស៊ីខាងកើតរឹតតែខ្លាំងទ្បើង ខណ:មន្ទីរបញ្ចកោណ នឹងដឹកនាវាផ្ទុកយន្តហោះចម្បាំង អាមេរិកចំនួន ០៣ គ្រឿង ឈ្មោះថា USS Carl Vinson, USS Ronald Reagan និងនាវា USS Nimitz ធ្វើដំណើរចូលសមុទ្រនៃប្រទេសជប៉ុន ឆ្ពោះទៅកាន់ឧបទ្វីបកូរ៉េ។ នេះបើយោងតាមរយ: ទីភ្នាក់ងារយ៉ុនហាប់ ចុះផ្សាយនៅថ្ងៃទី១៧ ខែមេសា ឆ្នាំ២០១៧។
រដ្ឋាភិបាលក្រុងវ៉ាស៊ីនតោន និងក្រុងសេអ៊ូល កំពុងពិភាក្សាគ្នាអំពីការធ្វើសមយុទ្ធរួមគ្នាមួយ ដែលរួមបញ្ចូលនាវាផ្ទុក យន្តហោះចម្បាំងអាមេរិកចំនួន ០៣ គ្រឿង ត្រូវបានរំពឹងថា នឹងបញ្ចូលមកកាន់សមុទ្រប្រទេសជប៉ុន នៅថ្ងៃទី ២៥ ខែមេសាខាងមុខ និងថែមទាំងមានការចូលរួមពីយន្តហោះយោធាមួយចំនួនទៀតផងដែរ។
កាលពីថ្ងៃអាទិត្យ កូរ៉េខាងត្បូង និងអាមេរិក បានអះអាងថា ការធ្វើតេស្តសាកល្បងមីស៊ីថ្មី ដោយទីក្រុងព្យុងយ៉ាង គឺត្រូវបានទទួលបរាជ័យ ខណ:ដែលកាលពីយប់ថ្ងៃសុក្រ មន្ត្រីយោធាកូរ៉េខាងជើង បានគំរាមកំហែងថា នឹងបំផ្លាញនាវាផ្ទុកយន្តហោះអាមេរិក ដែលបានធ្វើដំណើរមកជិតឧបទ្វីបកូរ៉េ នៅក្នុងករណីមានការឈ្លានពាន ពីអាមេរិកនោះ។
សូមជំរាបថា សមយុទ្ធនេះ មានឈ្មោះថា Max Thunder នឹងត្រូវធ្វើទ្បើងរយ:ពេលពីរសប្តាហ៍ ដោយវាបានស្ថិតក្នុងចំណោមសមយុទ្ធប្រចាំឆ្នាំ រវាងកូរ៉េខាងត្បូង និងអាមេរិក ដែលតែងតែធ្វើវាដូចរាល់ដងផងដែរ ប៉ុន្តែលើកនេះ វាត្រូវបានធ្វើឡើងនៅឯមូលដ្ឋានទ័ពអាកាស Kunsan ភាគនរិតីនៃឧបទ្វីបកូរ៉េ ចំពេលនៅទីនោះ កំពុងមានភាពតានតឹង ដោយសារតែការធ្វើតេស្តមីស៊ីលថ្មី របស់កូរ៉េខាងជើង៕
មតិយោបល់