ព័ត៌មានអន្តរជាតិ

ប្រធានាធិបតីកូរ៉េខាងត្បូង ប្តេជ្ញានឹងលុបបំបាត់កម្មវិធីអាវុធនុយក្លេអ៊ែរកូរ៉េខាងជើង

កូរ៉េ: ប្រធានាធិបតីកូរ៉េខាងត្បូងលោក Moon Jae-in បានប្ដេជ្ញាថា នឹងបន្តកិច្ចខិតខំប្រឹងប្រែង ក្នុងការលុបបំបាត់កម្មវិធីអាវុធនុយក្លេអ៊ែររបស់កូរ៉េខាងជើង ដើម្បីសន្តិភាព និងស្ថិរភាពនៅលើឧបទ្វីបកូរ៉េ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៩ ខែមិថុនា ឆ្នាំ២០១៧។

ការថ្លែងយ៉ាងដូច្នោះរបស់លោក Moon បានធ្វើឡើងនៅក្នុងសុន្ទរកថា ដើម្បីអបអរសាទរសន្និសីទប្រចាំឆ្នាំលើកទី ៣ ស្តីពីការបង្រួបបង្រួមឧបទ្វីបកូរ៉េ ដែលត្រូវបានរៀបចំរួមគ្នា ដោយក្រសួងបង្រួបបង្រួម និងទីភ្នាក់ងារព័ត៌មានយ៉ុនហាប នៅទីក្រុងសេអ៊ូល។

លោក Moon បាននិយាយថា «ការបង្រួបបង្រួមដោយសន្តិភាព ជាមួយកូរ៉េខាងជើង មិនមែនជាជម្រើស និងគោលការណ៍សមរម្យ ចំពោះកូរ៉េទាំងពីរនោះទេ ប៉ុន្តែវាជាគោលបំណង ដើម្បីធានាឲ្យមាននិរន្តរភាព និងសន្តិភាពដល់អ្នកជំនាន់ក្រោយ។

គួរបញ្ជាក់ដែរថា បច្ចុប្បន្នប្រធានាធិបតីកូរ៉េខាងត្បូង លោក Moon Jae-in កំពុងស្ថិតនៅក្នុងរដ្ឋធានីវ៉ាស៊ីនតោន សម្រាប់ការស្នាក់នៅរយ:ពេលបីថ្ងៃ ដើម្បីធ្វើកិច្ចប្រជុំកំពូលលើកដំបូងរបស់លោក ជាមួយប្រធានាធិបតីអាមេរិក៕

មតិយោបល់