ចិនៈ ក្រសួងកិច្ចការស៊ីវិល នៅថ្ងៃអង្គារនេះ បាននិយាយថា ចាប់តាំងពីថ្ងៃទី ២៩ ខែមិថុនាកន្លងមក ភ្លៀងនៅបន្តធ្លាក់យ៉ាងខ្លាំង នៅខេត្តចំនួន ១១ ក្នុងប្រទេសចិន ដោយបានសម្លាប់មនុស្ស ៥៦ នាក់ ខណៈដែល ២២ នាក់ទៀត កំពុងបាត់ខ្លួនរកពុំទាន់ឃើញនៅទ្បើយ។ នេះបើយោងតាមរយៈ​ សារព័ត៌មានចិនស៊ិនហួ ចេញផ្សាយនៅថ្ងៃ០៤ ខែកក្កដា ឆ្នាំ២០១៧។

ប្រភពដដែរ បានប្រាប់ឲ្យដឹងថា ផ្ទះសរុបចំនួន ២៧.០០០ ខ្នង ត្រូវបាក់រលំ និង ៣៧.០០០ ខ្នងទៀត រងការខូចខាត ដោយសារទឹកជំនន់, ការរអិលបាក់ដី និងព្យុះ ។

បើក្រសួងបានអះអាងថា នៅក្នុងហេតុការណ៍នេះ បានបង្កការខូចខាតដល់សេដ្ឋកិច្ចប្រទេសប្រមាណជា ៣,៧២ ពាន់លានដុល្លារអាមេរិក ។

គួរបញ្ជាក់ដែរថា កាលពីថ្ងៃចន្ទរដ្ឋាភិបាលមជ្ឈិម បានបែងចែកប្រាក់ចំនួន ១,៨៨ ពាន់លានយ័ន ទៅកាន់ខេត្តក្នុងប្រទេសចំនួន ២០ ដើម្បីជួយសង្គ្រោះប្រជាពលរដ្ឋពីគ្រោះមហន្តរាយ៕