ព័ត៌មានអន្តរជាតិ

ប្រធានាធិបតីហ្វីលីពីន ថាអាមេរិក កំពុងបង្កឲ្យប្រទេសអាស៊ាន មានជម្លោះជាមួយកូរ៉េខាងជើង

ហ្វីលីពីន: ប្រធានាធិបតីហ្វីលីពីន លោក Rodrigo Duterte បានព្រមានប្រឆាំងនឹងការប្រឈមមុខដាក់គ្នា ដ៏ខ្លាំងក្លាផ្នែកយោធា រវាងមហាអំណាច និងកូរ៉េខាងជើង បន្ទាប់ពីការបញ្ចប់ដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ នៅតំបន់អាស៊ីប៉ាស៊ីហ្វិក។ នេះបើយោងតាមសារព័ត៌មាន Aljazeera ចេញផ្សាយនៅថ្ងៃទី១៥ ខែវិ​ច្ឆិកា ឆ្នាំ២០១៧។

ថ្លែងនៅក្នុងសុន្ទរកថាចុងក្រោយ នៅឯកិច្ចប្រជុំកំពូលអាស៊ាន ក្នុងទីក្រុងម៉ានីលកាលពីថ្ងៃអង្គារ លោក Duterte បានព្យាករណ៍ថា «សង្រ្គាមជាមួយកូរ៉េខាងជើង នឹងជាទីបញ្ចប់នៃមនុស្សជាតិ ដោយការសម្លាប់យ៉ាងរង្គាល ជាមួយនឹងអាវុធនុយក្លេអ៊ែរ»។

លោក Duterte បានបន្ថែមថា មេដឹកនាំកូរ៉េខាងជើង លោក គីម ជុងអ៊ុន កំពុងលេងល្បែងកូនក្មេង ជាមួយអាមេរិក ខណ:ប្រើអាវុធប្រល័យលោកដ៏មានអានុភាពខ្លាំងជាង ២០០ ទៅ៣០០ នៃគ្រាប់បែកដែលអាមេរិក បានទម្លាក់លើជប៉ុន កាលពីអំឡុងពេលសង្គ្រាមលោកលើកទី២។

ដោយលោកបានបញ្ជាក់ថា ប្រទេសទាំងអស់ មិនអាចចាប់ផ្តើមជម្លោះជាមួយកូរ៉េខាងជើង ដែលអាចបង្កឲ្យមានវិបត្តិធ្ងន់ធ្ងរ រហូតដល់មានសង្គ្រាមព្រៃផ្សៃនោះទេ ខណ:លោកមិនចង់ឲ្យមានហេតុការបែបនេះ កើតទ្បើងនោះទេ ដោយសំអាងថា ប្រសិនបើសកម្មភាពអាវុធនុយក្លេអ៊ែរ និងមីស៊ីលផ្លោងអន្តរទ្វីប (ICBM)ផ្ទុះទ្បើងមែននោះ នឹងជាទីបញ្ចប់នៃមនុស្សជាតិ ព្រោះថាអ្វីៗទាំងអស់ ត្រូវបានបំផ្លិចបំផ្លាញគ្មានសល់៕

មតិយោបល់