អាមេរិក: ប្រធានាធិបតីអាមេរិកលោក ដូណាល់ ត្រាំ បានឲ្យដឹងថា កិច្ចប្រជុំកំពូលរវាងប្រទេសទាំងពីរ អាមេរិក-កូរ៉េខាងជើង នៅប្រទេសសិង្ហបុរីនាថ្ងៃទី ១២ មិថុនា នឹងត្រឡប់ទៅដូចដើមវិញ ពោលគឺវានឹងប្រព្រឹត្តទៅតាមការគ្រោងទុក បន្ទាប់ពីកិច្ចប្រជុំនេះ ត្រូវបានលុបចោល ដោយលោក ត្រាំ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២ ខែមិថុនា ឆ្នាំ២០១៨។
ការប្រកាសរបស់មេដឹកនាំអាមេរិកយ៉ាងដូច្នេះ បានកើតទ្បើងបន្ទាប់ពីកិច្ចចរចា ជាមួយបេសកជនជាន់ខ្ពស់កូរ៉េខាងជើងម្នាក់ នៅឯសេតវិមាន នៅពេលដែលលោកឧត្តមសេនីយ៍ គីម យ៉ុងឆុល បានប្រគល់លិខិតមួយពីមេដឹកនាំកូរ៉េខាងជើង ទៅកាន់ប្រធានាធិបតី ត្រាំ។
ភ្លាមៗនោះលោក ត្រាំ មិនទាន់បានបើកមើលវានៅឡើយទេ តែបាននិយាយថា លិខិតនេះ ពិតជាគួរឲ្យចាប់អារម្មណ៍ខ្លាំងណាស់ ដោយលោកបានបន្ថែមថា បញ្ហានៃការបញ្ចប់សង្គ្រាមជាផ្លូវការនៅកូរ៉េ នឹងមាននៅលើតុចរចា ក្នុងប្រទេសសិង្ហបុរី។
លោកត្រាំបានប្រាប់ក្រុមអ្នកយកព័ត៌មាននៅលើវាលស្មៅសេតវិមានថា “«យើងនឹងជួបប្រជុំគ្នានៅថ្ងៃទី ១២ មិថុនានៅប្រទេសសិង្ហបុរី”»។
យ៉ាងណាមិញលោក ត្រាំ បានក្រើនរំឭកថា កិច្ចប្រជុំកំពូលនេះទំនងជាមិនអាចសម្រេចបាននូវកិច្ចព្រមព្រៀងចុងក្រោយ ស្តីពីបញ្ហាកម្មវិធីនុយក្លេអ៊ែរដ៏ចម្រូងចម្រាស់របស់កូរ៉េខាងជើងនោះទេ។
សូមជំរាបថា ជំនួបជាប្រវត្តិសាស្ត្ររវាងប្រទេសទាំងពីរ នឹងក្លាយជាជំនួបលើកទីមួយ សម្រាប់មេដឹកនាំអាមេរិក កំពុងកាន់តំណែង និងមេដឹកនាំកូរ៉េខាងជើង៕
មតិយោបល់