Post News Media ព័ត៌មានអន្តរជាតិ លោក ត្រាំ៖ បក...

លោក ត្រាំ៖ បក្ស​ប្រជា​ធិបតេយ្យ​ ជា​អ្នក​សម្រេច​បិទ​រដ្ឋាភិបាល

អាមេរិក: ​ប្រធានាធិបតីអាមេរិកលោក ដូណាល់ ត្រាំ ​បាន​ប្រកាស​កាលពី​ថ្ងៃសុក្រ​ ​តាមបណ្ដាញសង្គម ​Twitter ​ថា «​ពួក​អ្នក​ប្រជា​ធិបតេយ្យ ​ជា​អ្នក​សម្រេច​បិទ​រដ្ឋាភិបាល!»។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២៣ ខែធ្នូ ឆ្នាំ២០១៨។

លោក ត្រាំ លើកទ្បើង​យ៉ាង​ដូច្នេះ​ ក្រោយនិយាយ​ថា ​លោក​នឹង​ទទួល​ខុស​ត្រូវ ​ចំពោះ​ការ​បិទ​រដ្ឋាភិបាល​មួយ​ផ្នែក​ ប្រសិន​បើ​សភា​មិន​បាន​អនុម័ត​ច្បាប់ ​ដែល​ជាការ​ស្នើដោយលោក ក្នុងនោះ​រួម​បញ្ចូលទាំង​ប្រាក់​៥​ពាន់​លាន​ដុល្លារ​ សម្រាប់​ធ្វើ​ជញ្ជាំង​ព្រំដែនផងដែរ​។​

កាល​ពីថ្ងៃ​ព្រហស្បតិ៍​ ​សភា​តំណាង​រាស្ដ្រ​​គណបក្ស​សាធារណរដ្ឋ​ បាន​អនុម័ត​ច្បាប់​គម្រោង​ចំណាយ​បណ្តោះ​អាសន្ន​ ដែល​រួម​មាន​ថវិកា ​សម្រាប់​ធ្វើ​ជញ្ជាំង​តាម​សំណើ​លោក​ប្រធានាធិបតី។​

លោក ត្រាំ​ បាន​និយាយ​តាម​ Twitter ​កាល​ពី​ថ្ងៃ​សុក្រ​ថា៖​ «បើសិន​ជា​គណបក្ស​ប្រជា​ធិបតេយ្យ​ បោះ​ឆ្នោត​បដិសេធ​ ​នោះ​នឹង​មាន​ការ​បិទ​រដ្ឋាភិបាល រយ:​ពេល​យូរ»។

ពាក់ព័ន្ធនឹងបញ្ហានេះ នៅឯ​សេតវិមាន លោក ត្រាំ​ ​បាន​បង្កើនកិច្ច​ខិត​ខំប្រឹង​ប្រែង​ទ្វេដង​ ក្នុង​​រយ:​ពេល​១១​ម៉ោង​របស់​លោក​ ដើម្បី​បន្ទោស​ការ​បិទ​រដ្ឋាភិបាល ទៅ​លើ​សមាជិក​សភា​គណបក្ស​ប្រជា​ធិបតេយ្យ ដោយលោក​និយាយ​ថា៖ ​«យើង​នឹង​ធ្វើ​ការ​យ៉ាង​លំបាក ​ដើម្បីឲ្យមានការអនុម័ត​នៅ​ព្រឹទ្ធសភា។

យ៉ាងណាមិញ លោកបញ្ជាក់ថា តាមមើលទៅ មិន​អាច​ទទួល​បាន​ការ​អនុម័ត​ទ្បើយ បើអ៊ីចឹងមែននោះ ​ពិតណាស់ថា ​​គណបក្ស​ប្រជា​ធិបតេយ្យ​ ជា​អ្នកសម្រេច​បិទរដ្ឋាភិបាល»៕