ព័ត៌មានអន្តរជាតិ

តួលេខមនុស្សស្លាប់ ដោយវីរុសឆ្លងកូរ៉ូណា នៅអ៊ីតាលីទ្បើងដល់ចំនួន ៣៦៦ នាក់ ខណៈសាលារៀនរបស់អារ៉ាប៊ីសាអ៊ូឌីត ត្រូវបានបិទទ្វារ

អ៊ីតាលី: យ៉ាងហោចណាស់មនុស្សចំនួន ១៣៣ នាក់ បានស្លាប់បាត់បង់ជីវិត ក្នុងរយ:ពេល ២៤ ម៉ោង ដោយសារការឆ្លងនៃវីរុសកូរ៉ូណា នៅអ៊ីតាលី ដែលនាំឲ្យតួលេខអ្នកស្លាប់សរុបកើនដល់ចំនួន ៣៦៦នាក់ហើយ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៩ ខែមីនា ឆ្នាំ២០២០។

រដ្ឋាភិបាលអ៊ីតាលី បានដាក់តំបន់ Lombardy និងតំបន់រងផលប៉ះពាល់យ៉ាងធ្ងន់ធ្ងរផ្សេងទៀតឲ្យនៅដាច់ឆ្ងាយពីគេ បន្ទាប់ពីមានប្រជាជនប្រមាណ ១៦ លាននាក់ រងផលប៉ះពាល់ ចំពេលដែលខ្លួន បានបង្កើនកិច្ចខិតខំប្រឹងប្រែង ដើម្បីដោះស្រាយការផ្ទុះឡើងនៃវីរុសដ៏ធំបំផុតនេះ នៅតំបន់អឺរ៉ុប។

ការផ្លាស់ប្តូរនេះ បានកើតឡើងនៅពេលមានការប្រយុទ្ធប្រឆាំង ដើម្បីទប់ស្កាត់ការរីករាលដាល នៃវីរុសនេះ ដោយមានករណីថ្មីនៃអ្នកឆ្លងចំនួន ១,២៤៧ នាក់ ត្រូវបានរកឃើញ ក្នុងរយ:ពេល ២៤ ម៉ោងចុងក្រោយ ពោលគឺមានការកើនឡើង ២៥ ភាគរយ។ ដោយគិតត្រឹមចុងថ្ងៃអាទិត្យនេះ ប្រទេសអ៊ីតាលី បានបញ្ជាក់ពីការឆ្លងសរុបចំនួន ៧,៣៧៥ នាក់ហើយ។

ទន្ទឹមនឹងនេះ នៅក្នុងប្រទេសអារ៉ាប់ប៊ីសាអូឌីតឯណ្ណោះវិញ អាជ្ញាធរបានបិទច្រកចេញចូលតំបន់ភាគខាងកើតតំបន់ Qatif ក្នុងគោលបំណង ដើម្បីទប់ស្កាត់ការរីករាលដាលយ៉ាងឆាប់រហ័ស នៃវីរុសកូរ៉ូណា។ ដោយទីក្រុងរីយ៉ាដ ក៏បាននិយាយដែរថា ខ្លួនបានប្រកាសផ្អាកការសិក្សាតាមសាលារៀន សាកលវិទ្យាល័យរដ្ឋ និងឯកជនទាំងអស់នៅទូទាំងប្រទេស ចាប់ពីថ្ងៃច័ន្ទនេះតទៅ ដោយមិនកំណត់ពេលវេលា រហូតដល់មានការជូនដំណឹងបន្ថែម៕

មតិយោបល់